Shillong, Nailur 26: Ki Pulit jong ka Anti Narcotic Taks Force (ANTF) East Khasi Hills District kiba la ïoh jingtip kaba bniah na ka tnat syntiat ha ka sngi Balang da ka jingïatreilang bad ki Pulit jong ka Lumdiengjri Police Station bad ka Jhalupara Out Post ha ka jingkhynra ha ka shnong Jhalupara, Shillong ki la ïohkem ïa kawei ka snar khaïi drok kaba la tip kyrtteng kum ka Aisha Khatoon ba ju khot sin kum ka Pahari, 50 snem ka rta kaba shong basah ha Lower Paltan Bazar, Shillong
Katkum u kyrwoh ba la phah da u Superintendent of Police jong ka East Khasi Hills u Bah S. Nongtnger, la pyntip ba ha ka jingkhynra, ki Pulit ki la ïoh ban kurup 73 tylli ki tyndong ba la thep ïa u powdar ba la suba ba u dei u drok uba khia 9.72 gram, 4 tylli ki mobile phone bad ka pisa kaba kot T. 27,410 hajar.
Ki Pulit ki la register da ka criminal case ha Lumdiengjri Police Station hapoh ka Section 21(b)/27A jong ka NDPS Act bad ka jingtohkit mynta ka dang ïaid shakhmat.
Kane ka jingkhynra ba seisoh jong ki Pulit ka jylla Meghalaya ka long kum shi bynta ban ïakhun thma pyrshah ïa ka jingïoh rung jong u drok hapoh kane ka jylla.
