Shillong, Iaiong, 28: Ki Pulit jong ka East Khasi Hills ha ka Lah sngi u Blei ki la kem ia u President jong ka North Eastern Hill University Students’ Union (NEHSU) u samla Sandy Sohtun halor ka jingshah kynnoh ba u donkti ban shoh bad ban byrngem pyniap ia u Assistant Professor Alok Singh uba hikai ha ka Deparment of Hindi ha skulbah NEHU, Shillong Campus.
Ia kane la pynthikna da u Superintendent of Police ka East Khasi Hills Bah Vivek Syiem bad iathuh ruh ba ki Pulit ki register case halor ka ejahar ba u Assistant Professor Alok Singh u la ujor pyrshah ia u samla Sandy Sohtun dang shen ha ki Pulit jong ka Mawkynroh Out Post.
Tang hapoh katto katne kynta ba la shah kem, ki Pulit ki la tian bishar ia u samla Sandy Sohtun ha Kashari bad ka Kashari ka la hukum ban set 7 sngi ha ha Judicial Custody na ka bynta ban ioh pynlong ia ka jingtohkit.
Kum ban shu pynkynmaw hangne, u Assistant Professor Alok Singh ha ka 25 tarik mynta u bnai u la ujor da ka ejahar ha ki Pulit ka Mawkynroh Out Post da kaba kynnoh ba u la shah shoh pynmynsaw ha u President ka NEHU Students Union u samla Sandy Sohtun uba don lang bad san ngut kiwei pat ha ka janmiet 24 tarik, Iaiong, 2025 ha ka por kumba 4:54 baje janmiet bad ong ruh ba kine ki samla pule kim shym la aidaw eiei pynban ki la pharep ba une u nonghikai u donkti ban leh politiks hapoh ka skulbah NEHU.
