Shillong, Lber, 23: Sa uwei u briew u la shah kem ha ki Pulit ha ka sngi Saitjaiñ halor ka jingdonkti ban pynbthei ïa u bom IED ha ka 9 tarik mynta u bnai ha Them Iew Mawlong.
Haduh mynta kiba la shah kem halor kane ka jingjia ki long 4 ngut.
“Ngi la kem kem ïa u briew uba saw mynta ka sngi ha kaba ïadei bad ka jingpynbthei bom. (La ithuh kyrteng ïa u kum) u Sansharbha Makdoh 24 snem ka rta uba sah ha Umroi, Ri-Bhoi,” la pyntip u Superintendent of Police ka East Khasi Hills Rituraj Ravi ha u kyrwoh ba la phah sha ki lad pathai khubor.
“Hynrei, ka jingtohkit halor kane ka jingjia ka dang ïai bteng na baroh ki liang,” u la ong.
Ha ka 19 tarik mynta u bnai, u Namphyrnai Lyngdoh Peinlang uba la 21 snem na ka shnong Peinlang u la shah kem na Mairang, Eastern West Khasi Hills bad la wanrah ïa u sha nongbah Shillong ha ka Lah Sngi u Blei. La lap ba u dei uwei na kiba shah suba donkti halor kane ka kam.
U SP u la pyntip ba u Namphyrnai u don ka jingïadei bad ki dkhot ka seng kieng atiar Hynñiewtrep National Liberation Council (HNLC). Katkum ka jingong jong u, ki Pulit ki la raikut ban kem lut ïa baroh ki nongkam bymman kiba donkti ha ka jingïasylla, ka jingïasuhbuit, kiba donkti bei pisa.
Dang ha ka 11 tarik mynta u bnai, ki Pulit ki la kem ïa u Tarson Lymba, 58 snem ka rta uba dei u nongïalam jong ka HNYF na Dawki katba ïa u Ebakordor Nongpluh 26 snem ka rta la kem na Malki, Shillong hadien ka jingjia bthei bom.
