Shillong, Lber, 23: Uwei u heprit uba dang 7 snem ka rta u khun jong ka Kong Bandari Shangpliang u la mynsaw jur namar ka jingleh torti jong ka Meghalaya Energy Corporation Limited (MeECL) kaba la shu ieh khongreng ia ka jaka ba la buh ia u Transformer khlem ka jingker ha ka shnong Lempluh, Nongspung Syiemship.
Kane ka la jia ha ka 13 tarik mynta u bnai katba une u heprit u dang mih ban ialehkai hajan une u Transformer.
Halor kane ka jingjia, ka KSU Nongspung Circle ka la leit sha kane ka shnong bad noh synniang ia u khun jong ka Bandari Shangpliang kum ka jingiarap.
“Nga dang don ha ing bad nga la phah leit lehkai ia u khun shabar, katba nga dang sait tiar nga shu ioh sngew kynsan ia ka jingbthei. Mar mar nga la mih shabar nga lap pynban ba u khun u la thiah lyndang ha madan bad ha ka por ba nga la leit shim ia u, ka bording ka la bret ia nga. Nga la pyrta jingiarap bad mar kumta la wan mih sa ki paramarjan ban ai jingiarap ia u khun jong nga,” la ong ka Kong Bandari.
Na ka jingshah bat ha ka bording, une u heprit u la mynsaw na ki bynta jong ki shympriah kti, shympriah kjat bad na ki bynta jong ka shadem.
Ki nongialam ka KSU ki la ong ba une u heprit u la mynsaw jur bad nalor ba u dei ruh na ka longing kaba kham duk kham kyrduh.
“Ngi kyrpad ia ka Sorkar khamtam ia ka MeECL ban leh eiei namarba kane ka kam iap kam im bad ba une u heprit lyngba ka jingiarap jong ka sorkar un ioh ia ka met kaba koit kaba khiah,” la ong ki nongialam ka KSU.
Ki la ong ruh ba ka seng ka la lap ruh ba kiba bun ki Transformer kiba don marjan bad shnong Lempluh ki dei ki bym ker sainar satia bad ym shym la buh bha ban iada ia ka iaid ka ieng jong ki paidbah bad la shu pyllait lyngkrang..
“Ngi kyntu ia ka Sorkar ba kan shimkhia ba kan ym jia shuh kum kine ki jingjia. Manla u bnai haba wan ka Bill thang bording, ngi siew bad ngi pynbiang hynrei balei haba don kum kine ki jingjia ki khein sting bad ki shim sting kim don kano kano ka jingsuidniew bad kim pyrkhat ia ki mynsiem jong ki parabriew,” ki la ong.
