Shillong, Naiwieng, 26: Ka Sorkar Jylla ha ka sngi Balang ka la pynbna ïa ki kyndon kiba kham pyrkhing ïa ki kali Sorkar, da kaba thmu ban khanglad ïa ka jingpyndonkam bakla ïa ki siren, ki beacon, bad ban tah iit iong ha ki kali.
“Ka Kynhun Myntri ka la mynjur ïa ka jingtyrwa ban pdiang ïa ka Standard Operating Procedures (SOP) ha kaba ïadei bad ka jingpyndonkam ïa ki Beacon, Flasher, ki Siren, bad ban tah iit iong bad kiwei kiwei ha ki kali Sorkar,” la ong u Myntri Rangbah ka Jylla u Conrad K. Sangma haba kren sha ki lad pathai khubor hadien ba la wai ka jingïalang jong ka kynhun myntri kaba nyngkong eh Ward’s Lake.
“Ban shu kren lyngkot, ka jingmut ka long mano ba lah ban pyndonkam ïa ka Siren bad mano bym lah ban pyndonkam ïa ki siren bad kumjuh ruh mano ba lah ban don ïa baroh ki Siren la ïathir sani bha bad ka don ka jingsngewkhia hapdeng ka Kynhun Myntri ba la donkam ban don da ka lad treikam kaba khanglad ïa ka jingpyndonkam ïa kum kine ki jait siren ha ka jingïaid lynti,” ong u Sangma.
U la pyntip ba ïa ki kali Sorkar kiba hap ha ka kyrdan Z+ yn shah ban pyndonkam ïa ki iit iong bad ïa ki Siren lah ban pyndonkam tang da ki kali jong ki Pulit, ki kali pynlip ding bad ki Ambulance bad ki kali Pulit kiba synran ïa ki VVIP bad VIP.
“Ha kaba ïadei bad ka jingpyndonkam ïa ki Light bad ki Beacon, ngi la kren shai bha ba ïa ki Light bad ki Beacon kiba saw yn nym shah ban pyndonkam da kino kino ki briew bad kata ka dei ka aiñ jong ka ri. La pyndonkam ïa ki Flasher kum ka jingbujli ïa kaba yn sa pynmih da ka jingpynbna da ka tnat Transports. Tang kito kiba la pynbna da ka tnat Transports ki lah ban pyndonkam ïa ki Flasher,” u la ong da kaba bynrap ba ka ophis jong u Myntri Rangbah ruh haba donkam kan hap ban thoh sha ka tnat Transports ban ïoh jingbit.
U Sangma u la ong ba ka don ka Komiti ba la khlieh da u Principal Secretary ban bishar ïa kane.
“Lada don kino kino ki kyrdan kiba donkam ban kynthup ïa kane ka komiti ba la khlieh da u Principal Secretary yn ai bor ban pyntip lada don kino kino ki briew ne ki kyrdan kiba dei ban kynthup lang,” u la bynrap.
Halor ka jingpyndonkam ïa ki Name Plate, u Myntri Rangbah u la ong ba ka tnad Transport kan sa pyntip ïa ka thup jong ki briew kiba dei hok ban pyndonkam ïa ki Name Plate.
“Ngi hap ban da kdew thikna bha namarba ki briew ki pyndonkam bakla da kaba buh ïa ki Name Plate ha ki kali. Kane ka dei kaei kaei kaba ngi sngew ba ka long kaba donkam bha ban buddien bad ban khanglad bad namarkata, ngin sa don ïa ka rukom treikam ka ban buddien ïa kata,” la ïathuh u Sangma.
“Kumba nga la ong ka tnat Transport kan sa mynjur mano ba lah ban buh bad phim lah ban shu buh lypa ïa ki Name Plate ne ki Flasher katba phi mon. Phi hap ban shim jingbit na ka bynta kata,” u la pynpaw haba bynrap ba ka jingpyndonkam ïa ka lama lairong jong ka ri kan long katkum ka aiñ Flag Code of India 2002 bad ki SOP.
