Shillong, Naitung 18: Haduh 67 ngut ki samla na kane ka jylla Meghalaya kiba pule ha ki shlem pule bapher bapher ha ka ri Bangladesh ki la wan phet noh shipor sha la ka jong ka jylla hadien ba ka la mih ka jingïakhih bad ka jingïaumsnam kaba jur ha ka ri Bangladesh.
Ka jingkulmar kala mih na ka jingbhah kam Sorkar kaba 30 percent da ka Sorkar Awami League na ka bynta ki bahaing hasem bad kiwei pat kiba la don bynta ha ka thma laitluid jong ka ri Bangladesh ha u snem 1971.
Ka jingïakhih ha nongbah Dhaka, Bangladesh ka la wanrah ruh ïa ka jingïap briew haduh san ngut bad da ki spah ngut ki la mynsaw hadien ba ki Pulit ki la siat da ki kuli jri bad ki bom pynsat khmat ïa ki samla pule University kiba ïakhun pyrshah ïa ka kynhun ki nongïakhih ba la kyrshan da ka Awami League Party.
Ka jingïakhih kaba la neh la shitaiew kynthih ka la nang jur hadien ba ki samla pule kim shym la sngap satia ïa ka jingkyrpad jong ka Myntri Rangbahduh ka ri Bangladesh bad ka Supreme Court kiba la bthah ba kin sangeh noh ïa ka jingïakhih bad ban leit phai biang sha ki kamra klas.
Ha u kyrwoh ba la phah da ka tnat Information and Public Relations ka Sorkar Jylla ha ka sngi Palei, la ïathuh ba ki don 202 ngut ki nong India kiba la wan phai sha la ka ri lyngba ka Dawki ICP. Na kine, 198 ngut ki dei ki samla pule bad 67 ngut ki dei ki samla pule na Meghalaya bad 131 ngut ki dei na kiwei pat ki jylla, 4 ngut ki dei ki nongjngohkai pyrthei.
Na ka ri Nepal ki don 101 ngut ki samla pule bad 7 ngut na ka ri Bhutan.
Ki samla pule kiba la wan da ka bos kaba khatduh eh ki la mih na ICP Dawki ha ka por 6:45 baje janmiet.
Halor kane ka jingjia, ka Sorkar Meghalaya ka la pyntip ba ka la ïakren bad ka Bangladesh High Commission bad ïa ka Indian High Commission, ka Land Port Authority, Dawki bad ka Exporters Association ban shimkhia katba lah ban peit ïa ka jingshngaiñ jong kine ki samla pule.
Na ka bynta ki jingïarap ba kyrkieh ki samla pule bad ki bahaing hasem ki lah ban telephone ïa u Addl. SP ka Jowai Police Station u Bah Hiwot Rymbai ha u mobile number: 91 96157 16153 uba la shah thung ruh kum u Nodal Officer ha khappud ryngkat lang bad u Executive Officer, Land Port Authority Dawki, u Thomas kum u Asst. Nodal Officer da kaba telephone ha u mobile number: 84150 60802. La buh ruh ïa u Helpline Number: 1800 345 3644.
