Shillong, Rymphang, 17: Uwei u Pulit Unarmed Branch Sub Inspector ka Ri Bhoi District u Amit Sinha u la khlad noh ha step sngi Saitjaiñ ha ka shnong Gurgoan, Delhi na ka jingiatakhuh kali.
U Amit Sinha u leit ia ka kam ophis sha Delhi bad kane ka jingjia ba sngewsih ka la wan jia katba u dang leit ryngkat lang bad u paralok jong u, u Digvijay Singh.
Katkum ka ejahar ba la ujor da u Digvijay Singh u la iathuh ba ki la mih ban leit bam jingbam ha Sector 58 Gurgaon bad katba ki dang wan phai da ka kali ia kaba la niah da u Digvijay Singh kynsan kynsan kawei ka kali ka la tynrah ia ka kali kaba ki shong na ki bynta ba shadien kat haduh ba u Amit Sinha u la mynsaw jur.
Ia u Amit Sinha la pynbna ba u la khladnoh da u Medical Officer ka Sanar International Hospital, Gurgaon bad u Digvijay Singh ruh u la mynsaw bad u la shah sumar ha kane hi ka Hospital.
