Shillong, Rymphang, 17: Ka Indira Gandhi Cultural Centre (IGCC) ryngkat ka jingiatreilang bad ka High Commission ka ri India sha Bangladesh lem bad ka tnad Arts and Culture jong ka Sorkar Meghalaya bad ka Bangladesh Shilkapala Academy (BSA), Dhaka ki la pynlong ia ka Cultural Programme kum shi bynta ban ai burom ia u Syiem Tirot Sing u Khlawait ka ri Khasi.
Kane ka jingaiburom ia u Syiem Tirot Sing ka long hadien ba ka Sorkar Meghalaya ka la trei shitom ban pynieng ia u durmot jong une u Syiem ka Hima Nongkhlaw ha phyllaw jong ka Indira Gandhi Cultural Centre (IGCC), Dhaka ia uba la plie paidbah da u Symbud Myntri Rangbah ka Jylla u Bah Sniawbhalang Dhar hynnin ka sngi Thohdieng.
Ia ka Cultural Programme la pynlong ha Jatiya Natyashala Milanayatan, Bangladesh Shilpakala cademy, Shegun Bagicha, Dhaka ha ka sngi Thohdieng.Ha kane ka sngi, la sakhi lang da u Symbud Myntri Rangbah ka jylla u Bah Sniawbhalang Dhar, ki Myntri Sorkar ba kynthup ia u Bah Paul Lyngdoh bad ka Dr. Mazel Ampareen Lyngdoh, u High Commisisoner ka India u Pranay Verma, ki MDC ka KHADC, ki Syiem bad ki Syiem Khynnah jong ka Hima Nongkhlaw, Hima Bhowal bad Hima Khyrim bad kiwei kiwei.
