Shillong, Jylliew, 09: U MDC barim jong ka Mylliem Constituency u Bah Sounder Strong Cajee u la khladnoh ha Bethany Hospital, Shillong ha ka sngi U Blei.
U Bah Sounder u dei u President barim jong ka Federation of Khasi-Jaiñtia and Garo People (FKJGP) bad uba don bynta ban seng ïa ka seng saiñpyrthei People’s Democratic Movement (PDM), kaba la jop 3 ngut ki MLA ha ka elekshon ka Ingdorbar Thawaiñ kaba la long ha u snem 1998.
U dei u para jong u MLA bad MDC barim jong ka Mawlai Constituency u Bah Founder Strong Cajee bad u Pakhynnahduh jong u President ka Voice of the People Party (VPP) Bah Ardent Miller Basaïawmoit uba dei u MLA jong ka Nongkrem Constituency.
U Bah Sounder u la ïakhun teng ïa ka elekshon MLA na South Shillong bad na Mawkyrwat Constituency ha ki snem ba ladep hynrei um shym la jop.
Haba phah ïa u kyrwoh sngewlem, u President ka FKJGP u Bah Dundee C. Khongsit u ong ba ka FKJGP ka pynpaw ïa ka jingsngewsih kaba khraw halor ka jingkhladnoh kyndit jong u nongïalam barim ka FKJGP ba la pynkha ha u snem 1989.
U la pynkynmaw ruh ïa u synñiang u bynhei jong u Bah Sounder bad ong ruh ba une u nongïalam ba la khladnoh u la rah bun tylli ki mat kiba ïadei bad ka jingrung kyrthep ki mynder bad u la pynbor ïa ki Autonomous District Councils (ADC) ban pynthikna ba ki bym dei ki riewlum kim dei satia ban ïoh trei ïa kino kino ki kam khlem da ïoh shwa ïa ka Trading License.
“Ka jingkhladnoh jong u, ka la long ka jingduh kaba khraw ïa ka jaidbynriew Khasi baroh kawei,” ong u Bah Khongsit.
Tang shu ïoh jingtip halor kane ka jingjia ba sngewsih, u MLA jong ka South Shillong Constituency Bah Sanbor Shullai u la phah ïa u kyrwoh sngewlem sha ka kurim bad sha ki khun jong u Bah Sounder ba U Blei Un pyntngen ïa ki ha kum kane ka por ba u lyoh badum u la tap ïa ka ing ka sem baroh kawei.
U MLA ka Pynthorumkhrah Constituency Bah AL Hek u la pynpaw ïa ka jingsngewsih da kaba ong, “ka jingkhladnoh kyndit jong u ka la pynkynmaw ïa nga ïa kito ki sngi ba ngi la ïathir ïatai ban seng ïa ka Federation of Khasi Jaintia and Garo People, ka kynhun kaba peit ïa ka bha ka miat, ban ïada ïa ka hok jong ki trai jylla, Khasi, Jaintia bad Garo ka Jylla Meghalaya.”
“U Bah Sounder u la long u President bad ma nga kum u General Secretary jong ka FKJGP, Central Body. Ngi la ïaid kylleng ki kyndong kynshrot jong ka jylla Meghalaya da kaba buh hakhmat ïa ka thong ban peit ïa ka bha ka miat, ban ïada ïa ka hok jong ki trai jylla ritpaid. Nga la ithuh ïa u la bun bun snem, u dei u briew uba bha bad uba la leh bun ki kam na ka bynta ki paidbah ka jylla Meghalaya,” la ong u Bah Hek.
“Ngan ïaid kynmaw ieid ïa u Bah Sounder. Nga duwai ruh na ka bynta jong phi Meban Donnam Saiborne bad Lapynhun Shisha Saiborne bad ïa kito kiba don ka jingïadei kaba jan bad u Bah Sounder,” la bynrap u Bah Hek.
