New Delhi, Jylliew 09: U Myntri Rangbah duh ka ri u Narendra Modi u la bam smai ha ka sngi u Blei ryngkat bad ki 72 ngut ki Myntri ha ka Sorkar khleh khaw lang jong ka National Democratic Alliance (NDA) ba la ialam da ka BJP.
Ki 30 ngut ki dei kiba don hapoh ka kynhun Myntri, kumba 5 ngut pat ki dei Myntri ba ioh peit laitluid ia ki tnat treikam (Indipendent Charge) bad 36 ki dei ki Myntri Khynnah. Ia ka jingbate kam yn sa pynbna noh shen hapoh shi sngi ne ar sngi.
U Modi, uba la dap 73 snem ka rta un sa ïalam ïa ka Sorkar khleh khaw lang ha ka samoi treikam kaba lai kata naduh u snem 2014 hadien ba u la pynkhllem ïa ka Sorkar United Progressive Alliance (UPA) ba ia lalam da ka Congress kaba la bat ia u lakam synshar la kumba 10 snem.
U Modi un dei u un dei u Myntri Rangbahduh ban shimti haduh lai sien hadien u Jawaharlal Nehru uba la ïoh ban bam smai haduh lai sien lai wat kum u Myntri Rangbahduh ka ri.
U Modi u la jop ïa ka elekshon Lok Sabha na Varanasi Constituency da kaba ïoh kumba 1.5 lak vote.
Ha ka jingialang bam smai ba la pynlong ha Rashtrapati Bhavan ka President Droupadi Murmu ka la pyntian smai ïa u Modi bad ïa u Rajnath Singh, ia u Amit Shah. Ka khubor ka iathuh ba u Nitin Gadkari ruh u la shah pyntian smai lang ha kane ka sngi kynthup ruh u JP Nadda, Shivraj Singh Chouhan, ka Nirmala Sitharaman, u S. Jaishankar, bad u Manohar Lal Khattar ki la shah pyntian smai lang ha kane ka sngi.
Kiwei kiwei kiba la shah pyntian smai ki kynthup ïa u HD Kumaraswamy na ka Janata Dal (Secular), u Khattar, u Lalan Singh bad kiwei kiwei.
Katba u Narendra Modi u dang pynkhreh ïa ka jingbam smai kum u Myntri Rangbahduh ka Ri ha ka sien kaba lai, ki jingïamutdur mano ban ïoh ïa ka shuki Myntri ka la jur bha mynta.
Lada dei ban ïakren ïa ka jingïoh shuki Myntri na ki Jylla ka thaiñ Shatei Lam Mihngi, ha kane ka kynti ba mynta, imat tang lai ngut kin ïoh ïa ka shuki, kaba long jan mar shiteng na kaei kaba ïoh ha ka Sorkar Modi 2.0.
Katkum ka khubor, u MP ka Lok Sabha na Dibrgarh, Assam u Sarbananda Sonowal, u MP ka Rajya Sabha bad u Press Advisor jong u Myntri Rangbah ka Assam Patriba Margherita, ki dei kiba la thikna ban ïoh ïa ka shuki Myntri.
Nalor kine, u Kiren Rijiju, MP ka Lok Sabha na Arunachal Pradesh West, u lah ban shah kynthup lang ha ka kynhun Myntri bathymmai, ong ka khubor.
Baroh kine ki MP ki la leit ïashim bynta ha ka jingkhot dihsha ha ïingsah jong u Modi shuwa ka jingïathaw Sorkar kaba la long mynta ka janmiet.
