Shillong, Jymmang, 01: Ki dkhot jong ka Khasi Students’ Union (KSU) ha ka sngi Palei ki la pynlong da ka jingïakhih ba khlem pud sngi hakhmat ka Administrative Block jong ka North Eastern Indira Gandhi Regional Institute of Health & Medical Sciences (NEIGRIHMS) kum ka dak ban pynpaw ka jingpyrshah ïa ka jingbym lah jong kane ka shlem treikam ban pynurlong ïa kiba bun ki jingdawa, kaba kynthup ruh ïa ka jingpyntreikam ïa ka 80:20 Female-Male Ratio.
“Ngin ym mih na NEIGRIHMS. Kane ka jingïakhih kan dang ïai bteng tad ba ngin da ïoh ïa ki jingdawa. Namarkata, ngin ap ïa u Director ban shim rai halor kane ka ka,” la ong u Chairman jong ka Employment Cell ka KSU u Reuben Najiar ha ka jingïakren bad ki lad pathai khubor.
U la pyntip ba Director u la phah ïa u Deputy Director ban ïakren bad ka Union hynrei, “ngi la kyntait mardor ba ïakynduh ïa u namarba ngin ym khih satia na kane ka jaka tad haduh ba u Director dalade hi un ai ha ngi ka jingkular ba baroh ki jingdawa jong ngi dei ban pynurlong noh kham kloi.”
U samla Najiar u la ong ruh ba ka Union ka la dawa ba dei ban pyntreikam noh mardor ïa ka 80:20 Female-Male ratio, ka rta thungkam, ka jingbuh ïa ki Examination Centre ha Meghalaya bad kiwei kiwei kiba ïadei bad ka polisi jingthungkam hapoh ka shlem treikam, kaba ïa mynta ka long pyrshah ïa ka bha ka miat jong ki trai ri trai muluk bad kaba long pynban ka jingplie lad ban pynmyntoi ïa kiwei pat ki jaitbynriew kiba nabar ka jylla ban ïohkam ïohjam hapoh NEIGRIHMS.
“Ngi la ïakynduh ruh ïa ki MP jong ka Meghalaya, kiba la phah mardor da ka jingthoh sha ki bor pynïaid jong ka NEIGRIHMS ban weng ïa ki jingeh. Hynrei, u Director ka NEIGRIHMS um patiaw hynrei u khynñiat kylla ïa ka Ministry of Health and Family Welfare ka Sorkar India hynrei ngi don ki sakhi sabut kiba shai kdar ban pyni ba ka Ministry kam don bynta eiei halor kane namarba baroh ka shong ha ka Governing Council jong ka NEIGRIHMS,” u la ong.
Ka NEIGRIHMS da ka jingai jingbit jong ka Governing Council ka lah ban pynurlong ïa ki jingdawa jong ka Union. Hynrei kaba sngewsih ka long ba u Director u leh mynthi halor kane ka kam bad dei na kata ka daw kaba pynlong ïa ka Union ban pynlong da ka jingïakhih kaba khlem pud sngi, la pynshai shuh shuh u Chairman jong ka Employment Cell ka KSU.
Katkum ka jingong jong u, wat hadien ba ladep ka sngi khatduh ban thep ïa ki aplikeshon katkum ka jingpynbna ïa ka Advertisement ha ka 28 tarik Ïaiong, u Director jong ka Institute um shym la lah satia ban pynurlong ïa ki jingdawa.
“Lada ki ïaid shakhmat ïa kane ka jingthungkam, kan ktah ïa ka shlem treikam bad ïa ka jingsumar namarba ka jingdon jong ki Nurse shynrang ka la tam ban ïa ki Nurse kynthei. Kane kan ktah haduh katta katta. Lada kine ki Nurse kynthei kin shongthait ym don Nurse kynthei shuh hynrei ha NEIGRIHMS kin don sa tang ki Nurse shynrang. Namarkata kam don jingmut shuh halor kane ka thungkam,: u la ong.
Kat haduh ba la pynmih ïa kane ka khubor, ki dkhot ka KSU ki dang ïai bteng ban pynlong ïa ka jingïakhih hapdeng ka jingpahara jong ki bor Pulit.
