Shillong, Naitung 01: Ka Passing Out Parade jong ka Batch kaba phra jong ki Pulit langrut kaba la long ha ka jaka ai jinghikai ha APTC Sohpian West Khasi Hills District ka la long kaba ïaid beit ïaid ryntih wat hapdeng jong ka jingpynthut jong u slap, ha kaba ka Director General of Police ka Jylla ka Kong Idashisha Nongrang ka la long kum ka Kongsan ha kane ka sngi.
Ha kane ka sngi, ka tnad Pulit jong ka jylla Meghalaya ka la ïoh biang sa 193 ngut ki Pulit Constable bad 18 ngut ki Follower kiba la pyndep ïa ka jingshah hikai pyntbit ha ka jaka ai jinghikai kaba don ha 4th MLP Batallion ha Sohpian.
La sakhi lang ia kane ka sngi kaba kmen da u Commandant jong ka 4th MLP Batallion u Bah Lakador Syiem, u Superintendent of Police jong ka West Khasi Hills u Bikram D. Marak, ki heh pulit ka jylla, ki bahaiing hasem jong ki Pulit kiba la pyndep ïa ka jingshah hikai bad kiwei kiwei kiba la shah khot sngewbha.
Ka DGP ka la sam ruh ïa ki khusnam sha ki 10 ngut ki Pulit Constable bad 3 ngut ki Follower kiba la leh bha ha ki jingshah pyntbit bapher bapher.
