Shillong, Jylliew, 30: Ka Central Executive Council (CEC) jong ka United Democratic Party (UDP) ha ka sngi Thohdieng ka la iathir bad iatai sani bha halor ka Reservation Policy bad ka Roster System shwa ban aiti ia ki jingai jingmut sha ka Expert Committee ba la thung da ka Sorkar Jylla.
Ha ka jingiakren bad ki lad pathai khubor hadien ba la wai ka jingialang, u General Secretary ka party u Dr. Jemino Mawthoh u la ong, “kum ka party ngi la shimkhia bha ia kane ka kam namarba ym tang kiwei kiwei ki kynhun kiba kwah ban khmih bniah biang ia ka Reservation Policy.”
“Ngi la bsuh ruh ia kane ka mat ha ka Election Manifesto ha ka elekshon ba ladep bad hadien kata ngi la shong jin kumba 12-13 sien ki jingialang ban iathir kumno ban ai jingmut halor ka Reservation Policty bym pat khmih bniah mynta la 51 snem kynthih,” la ong u Dr. Jemino.
“Ngi la ioh ia ki jingai jingmut na ki Legal Expert, ki Scholars bad ki Social Scientist kumno ban pynwandur ia ka Reservation Policy bad ka Roster System khnang ba ki jaidbynriew ha kane ka jylla kin ym shah ktah. Ngi kwah ban pynwandur ha kata ka rukom bad ngi kwah ba ka Sorkar lada ka pynwandur kan ym don ka jingleh shiliaing bad kan long kaba pdiang hun da baroh ki jaidbynriew kiba shong basah ha kane ka jylla,” la bynrap u Dr. Jemino.
U la iathuh ba hadien ba la iathir sani, “ki don phra tylli ki jingshem kiba yn sa ai jingmut sha ka Expert Committee ba la khlieh da ka Dr. Ampareen Lyngdoh bad shwa ban leh ia kata, ngi la wanrah shwa hakhmat ka CEC jong ka party. Hynrei ki dang don katto katne ki bynta kiba ka CEC ka la ai jingmut ba kan bha ban pynkylla katto katne.”
“Ka CEC ka la aibor ha ka Core Committee jong ka UDP ban leh ia kaba donkam na ka bynta ban bsuh ia ki jingai jingmut jong ka CEC ha kane ka sngi. Kane ka ishu kam dei ka ishu basuk, ngi hap ban iathir iatai bha na baroh ki liang. Halor kine ki jingai jingmut yn sa rah shwa sha ka Core committee ka ban shim por sa tang ar ne lai sngi bad hadien kata ngin sa phah sha ka Sorkar,” la bynrap u Dr. Jemino.
Ha kajuh ka por, u General Secretary ka UDP u la iathuh ba ka CEC ka la rai ban wanrah katto katne ki jingpynkylla thymmai ha ka Riti Treikam jong ka Party shwa ba ka party kan pynlong ia ka General Council ha ka 29 tarik Naitung 2023 hadien ba ka samoi treikam jong ka CEC kaba mynta ka la kut.
“Ka jingjied ia ki nongkitkam kan long 29 tarik Naitung 2023 bad ngi la jeid ia ki dkhot jong ka Nomination Committee ki ban sa pyniaid ia ka elekshon,” u la bynrap.
