New Delhi, Jylliew, 30: Ka Myntri ka tnad ka Koit ka Khiah ka Sorkar Jylla ka Dr. Mazel Ampareen Lyngdoh kaba la iashim bynta kum ka Kongsan ha ka rynsan, “The Economic Times’ Best Healthcare Brands 2023 kaba hynriew kaba long ha nongbah Delhi.
Haba kren ha ka jingialang, ka Myntri ka la kren halor ka bynta ban pyntikna ba ki nongioh jingmyntoi kin suk ban ioh ia ka jingsumar bad ruh ha ka dor kaba bit ha ki shnong ki thaw.
Ha kane ka jingialang la iashim bynta lang ruh da u Joint Secretary ka tnad ka koit ka khiah jong ka Sorkar India u Vishal Chuahan, u Dr. K. Madan Gopal uba mihkhmat na ka National Health Systems Resource Centre jong ka tnad ka Koit ka Khiah ka Sorkar Pdeng nalor kiwei kiwei ki ophisar bad ki kynrem lyndan.
Da kaba pynpaw ia ka jingkmen haba kren ha ka jingialang, ka Dr. Lyngdoh ka la ong, “nga ai ka jingiaroh ia ka ET Edge kaba la pynlong ia kane ka lympung ha ka sien kaba hynriew jong ka Doctors Day Conclave.”
Lyngba kane ka sienjam kaba la wanlam lang ia ngi baroh hangne, kan iarap pat ba ngin treilang ban iasam ia ki jingtip bad ruh ban pyni ia ka jingtbit na ka bynta ban pynwandur shuh shuh ia ka jingshakri ha ka koit ka khiah. Ka jingkylla kaba pura ka sah mynta sa ha ka jingiatrei lang bad ruh kum kawei ka bor. Nga dap ruh da ka jingkmen ban sakhi ia ka jingkynduh lang jong ki riewshemphang kiba la tbit ha kane na bynta ban pynkylla dur ia ka koit ka khiah ha ka ri jongngi.”
Ka Dr. Lyngdoh ka la bynrap, “ka jylla Meghalya ka la pyntreikam ia ka rukom ai jingsumar kaba peit lut nadong shadong na bynta ki nongshong shnong kiba don ha ki kyrdan bapher bapher ha ka ioh ka kot. Ka bynta kaba ngi buh hakhmat ka long ruh ban pynleit jingmut ym dei eh tang ha ka jingai jingsumar hynrei khamtam eh ban iada lypa bad ruh ban pynsgewthuh bad pynshai ia ki. Lyngba ka Meghalaya Health and Insurance Scheme, ka jylla ka pyrshang ban pynpoi ia ki jingmyntoi sha baroh ki bynta jong ka imlang sahlang. Ka Meghalaya ka dei kawei na ki jylla ha ri India kaba la don la ka jong ka jingpeitngor ia ka heh ka san jong ki heprit lane ka Early Childhood Development Mission, kaba la pyllait paidbah ha u 2021, kaba buh thong ba ki heprit kin ioh ia ka jingsumar kaba paka, ka bam ka dih bad baroh ki jingdonkam haba ki dang don ha kitei ki rta. Ka Meghalaya ka dei ka jylla kaba dang 51 snem bad ngi hap ban lum kham bun ki jingtip na kum kine ki rynsan.”
Haba iaroh ia ka jingtrei borbah jong ki nongtrei ka koit ka khiah, ka Myntri ka la pynpaw ia ka jingkmen kaba khraw halor ka sienjam jong ki. Ka shim ruh ia ka kabu ban ai khublei ia baroh ki doktor kiba tei borbah bad aiti lut ialade bad ka iing ka sem na bynta ka koit ka khiah jong ki nongpang.
Haba phaidien halor ka jingktah jong ka khlam COVID-19, ka Myntri ka la ong ba baroh ka dei lyngba ka jingshlur bad aiti lut met bad mynsiem jong ki nongtrei ka that ka koit ka khiah.
Nalor ka jingai khusnam, ka la don ruh ka jingiasyllok bad ka rynsan iatai halor ka phang pdeng kumno ban ioh ia ka jingsumar kaba paka katkum ka juk mynta tangba ha ka jinglut kaba kham duna da kaba pyndonkam ia ki jingtip da ka jingiarap jong ka Artificial Intelligence ban lah pyntreikam pura ia kitei ki thong hapdeng ka jingkyrduh ka pla tyngka bad ka jingeh ban wanrah ka jingkylla.
