Shillong, Jymmang 27: Ki Pulit ka Sadar Police Station ki la khot hajir ïa u President ka Hynñiewtrep Youths Council (HYC) Bah Roy Kupar Synrem ha kaba ïadei bad ka jingpynngat kyndon ha ka MMPO namar ka jingleit pynpra ïa ki ïing sah beaiñ ki poiwir ha Lum Survey dang shen.
Ha ka notis ba la soi da u Sub Inspector BS Sangma jong ka Sadar Police Station la bthah ia u Bah Roy Kupar Synrem la bthah ba um dei ban pep na ka jingshah khot hajir hynrei lym kumta un ngat ha ka jingshah kem.
Ha kane ka shithi khot hajir ki Pulit ki la buh ruh ia kiba bun ki kyndon, kiba kynthup ba kim dei shuh ban thaw ki jingkulmar hadien habud. Kane ka jingkhot hajir ka la bthah ruh ba ka HYC kam dei ban byrngem byrsit lane ka jingthaw kulmar ha ki bynta jong ka thanad Pulit, ki dei ban ïatreilang bad ki Pulit ha kaba ïadei bad kane ka jingtohkit bad kim dei ruh ban pynjot ne pynjah ïa kino kino ki sakhi ha kaba ïadei bad kane ka Case.
Kum ban shu pyntip, hadien ba ka HYC ka la leit ban pynpra ïa ki 80 tylli ki ïing beaiñ ha Lum Survey u Deputy Commisioner jong ka East Khasi Hills u la pynngat ha ki kyndon bapher bapher jong ka IPC bad ha ka aiñ Meghalaya Maintenance of Public Order (MMPO) da kaba kynnoh ba kane ka dei ka kam beaiñ ba la shim ïa ka aiñ ha ka kti.
Ka HYC ka la leit ban kyndang ïa kine ki ïing beaiñ ha ka sngi Palei jong ka taiew baladep hadien ba la ka ap kumba artaiew na ka jingpan por jong ka Sorkar kan lum shwa ia ki jingtip ba thikna ha kaba ïadei bad kane ka jaka.
Ha ka taiew ba ladep u DC u la khot da ka jingïalang ka ban long mynta ka Lah Sngi u Blei ban ïakren halor ka jaka sah ki poiwir ha Lum Survey da kaba khot lang ïa u CEO ka Shillong Municipal Board, Shillong Cantonment Board, ki nongmihkhmat na ka Defence Estate Officer, Guwahati bad ïa ka HYC hynrei la pyntip noh ba ïa kane ka jingïalang la pynsangeh noh.
