Shillong, Jymmang, 27: Ka Sorkar Jylla kaba la ïoh ïa ka jingbthah kaba bniah ban shim ïa ki lad jingïada na ka jingwan lynshop jong ka eriong Remal naduh ka miet 26 tarik Jymmang, 2024 bad ka ban dang bteng haduh ka 28 tarik Jymmang, 2024 ka la bthah ïa ki Deputy Commissioner jong ki District bapher bapher ka Jylla ba kim dei satia ban thiah hynrei ki dei ban long kiba peitngor baroh arphew kynta.
Ha ka jingïakren bad ki lad pathai khubor hadien ba la kut ka jingïalang pyrkhat kam, u Symbud Myntri Rangbah ka Jylla Bah Prestone Tynsong u la ïathuh ba ka Sorkar ka long kaba la pynkhreh ban ai jingïarap ïa ki nongshong shnong jong ka jylla lada jia kino kino ki jinglynshop kiba wan na ka bor jong ka mariang na ka daw ka jingwan iuhkjat jong ka eriong Remal.
U la kyntu ruh ïa ki paidbah nongshong shnong jong ka Jylla ba kim dei ban khih khuslai hynrei ki dei ban ai ka jingïatreilang bad ki tnat treikam bapher bapher jong ka Sorkar Jylla, la ka long ha ki shnong ki thaw bad ha ki district.
U la ïathuh ba ka Sorkar ka la pynkhreh lypa ïa ka song pisa ban ïarap ïa kino kino ki briew kiba ngat ïa ki jingtwa khyndew, twa ki ing ki sem bad kiwei kiwei ki jingjia ha ki 24 kynta ki ban sa wan.
Katkum ka jingïathuh jong u Symbud Myntri Rangbah, ki district ki ban shah ktah bha na ka jingwan lynshop ka eriong Remal ki long ka West Jaintia Hills, ka South West Khasi Hills, East Khasi Hills bad ka Eastern West Khasi Hills.
Haba kylli, u la ïathuh ba ka Sorkar Jylla ka la don lypa T. 20 klur ka pisa ha kti ban ai jingïarap ïa kino kino kiba ngat ha ki jingjia kiba sngewsih katkum ka jingmynjur jong ki Deputy Commissioner.
“Tang shu phah ïa ka jingmynjur (na ki DC) ka Sorkar kan mang noh mardor ïa ka pisa,” u la ong.
Halor ka jingdon ki dieng ba la rim kiba buh jingma ïa ka leit ka wan bad ka jingim jong ki paidbah, u Bah Prestone u la ong ba ka tnat Forest ka dei kaba peit ïa kine. “Ha Meghalaya, ki bun ki jaka khlaw, kiba hap hapoh ka jingpeit jong ki Syiem, ki Raid. Ïa kane, ngin hap ban ïashong pyrkhat lang bad ki kynhun bapher bapher ban ïakren sani bha shwa ban pynngat ïa ki dieng kiba buh jingma,” u la ong.
Shuh shuh u la ong ruh ba ym tang ka tnat PWD, ka Municipal bad ka Urban Affairs kiba hap ban shim jingkitkhlieh ïa ka jingshlei um ki surok ha kylleng ka sor Shillong hynrei ka dei ka jingkitkhlieh lang jong ki paidbah.
“Ngi ladep ithuh ïa ki jaka ba ju jia khah khah ka jingshlei um bad tang shu kut ka jinghap slap, ka tnat PWD bad ka Urban Affairs bad ka Shillong Municipal Board yn sa shna pynbna noh mardor ïa ki surok bad ïa ki nala,”u la ong.
Ha kaba ïadei bad ka jingai shuti ïa ki skul, u Bah Prestone u la ong ba ka Sorkar ka la ieh beit ha ka jingstad jong ki Deputy Commissioner ban ïasyllok bad ki Sub-Divisional School Education Officer (SDSEO).
