Shillong, Jymmang, 10: U Ambassador Ri France sha India Thierry Mathou ha ka sngi Thohdieng u la leit jngoh ia ka Lawkyntang bad ia ka Heritage Village kaba don ha ka shnong Mawphlang, East Khasi Hills District.
Ia u Mathou la synran lang da u Consul General ka ri France ha Kolkata u Didier Talpain ryngkat ka jingdon lang jong u Myntri ka Hima Mawphlang u Bah S Sohliya, u Chairman ka Grand Council of Chiefs of Meghalaya bad Adviser ka Federation of Khasi States Bah John F Kharshiing, u Secretary General jong ka North East Sports Association (NESA) uba long ruh u Chairman jong ka SPIKAP, u Bah Tambor Lyngdoh, u nongseng ka Mawphlang Sustainable Tourism Societies bad Bah D. Lato uba dei u Tourism Officer.
Na ka liang jong ka Hima Mawphlang ka la pdiang sngewbha ia kine ki kynrem ki lyndan na ka ri France lyngba u Myntri S. Sohliya bad kiwei ki dkhot jong ka Hima bad la synran lang ia ki da u Bah Tambor Lyngdoh uba dei u nongseng jong ka Mawphlang Sustainable Tourism Societies (MSTS).
U Bah Tambor Lyngdoh u la ai sngewbha ia u Ambassador Thierry Mathou da ka kot Collection of Knowledge on Khasi Herbal Plants, Stories and Ooems kaba u la pynmih paidbah.
Hadien kane kine ki kynrem ki lyndan ki la leit jngoh sa ia ka Mawphlang Dam kaba ju bsa um ia ka Sor Shillong baroh kawei.
Ha kane ka jaka u Bah John Kharshiing u la ai ia u Ambassador Thierry Mathou bad ia u Counsel General u Didier Talpain ia ka kot “The Khasi States – A Brief Historical Timeline – 1771 to 2017.”
Kine ki kynrem ki lyndan ki la dap da ka jingkmen ban iohi ia kane ka spah meiramew bad ban ioh ban iaid hapdeng ka lyer kaba khuid bha kaba la pynshlur ia ki ban iaid kjat katto katne por hapdeng ka jingshoh biej ia ka jingitynad ka Law Lyngdoh Law Kyntang Mawphlang bad ka Mawphlang Dam.
Hadien ba wanphai sha sor Shillong ki la leit ban iakynduh sa ia u Chief Secretary jong ka Sorkar Jylla u Bah Donald Wahlang ryngkat ka jingiadon lang jong u Commissioner and Secretary ka Sorkar Jylla u Dr Vijay Kumar D, ha kaba ki la iasyllok sani bha halor kiba bun ki phang treikam bad la ioh jingiakren ruh halor kumno ban ioh ka jingiatreilang ha ki kam kilan sports.
