Shillong, Jymmang, 10: Ki dkhot jong ka Khasi Students Union (KSU), Delhi Unit ha ka sngi Thohdieng ki la pynkup burom ia ka Kong Sibbi Passah halor ka jingïoh ïa ka khusnam Padma Shri na ka President jong ka Ri India.
Ia kane ka jingpynkup burom la lamkhmat da ka President ka seng ka Samla Marbiang Khongwir bad u Vice President u samla Donboklang Pohrmen.
Ka Kong Silbi kaba la pynpaw ia ka jingsngewnguh ia ki dkhot ka KSU kiba la leh burom ruh ia ka, ka la sneng la kraw ia ki da kaba ong, “Da leh tipsngi bad nang iai minot.”
“Nga da sngewheh ka mynsiem haba nga don ha Delhi kum ban shu ong noh ban iohi ia ki khun ki kti lajong kiba wan iakynduh ia nga ngam sngew kynjah. Nga kitbok kitrwiang ba phin nang iaid shaphrang,” la ong ka Kong Silbi ia ki dkhot ka KSU.
“Haoid, ngi la iabeh ia ka jingang jingstad bad lada phi don haei haei ruh phim dei ban klet ia kaba u longshwa u la buh khamtam ha ka ktien ka thylliej. Lada phi pule ia ka English ne ka Hindi hynrei kynmaw ban ieid ia la ka jong bad haba phi iakren paramaphi phim dei ban iakren da ka (ktien) jong kiwei,” ong shuh shuh ka Kong Silbi.
