Shillong, Jylliew, 02: U MDA ka Tura u Bernard N. Marak uba long ruh u Vice President ka BJP ha ka sngi u Blei u la dawa ban thung mar dor ïa ka jingtohkit halor ka jingtrei torti jong ka kompeni kaba shna ïa ka P.A.Sangma stadium.
Ka kompeni kaba shna ïa ka P.A Sangma Stadium ka dei ka kompeni bymlarkam namarba kane ka dei ka sien kaba ar, ba ka kynroh ba la shna thymmai jong ka Stadium kan khyllem tang hapoh shi bnai baladep shna pura, ong u Bernard Marak ha u kyrwoh ba la phah sha ki lad pathai khubor.
U Marak u la ong, bun ki jingorpait ba lah ban ïohi ha ka Swimming Pool bad hakhrum jong ka Stadium ba la shna thymmai. Haba ka kynroh banyngkong ka la kyllem, la ujor da ka ejahar hynrei ki Pulit kim shym la leh eiei pyrshah ïa ka kompeni bad mynta ha ka sien kaba ar ka kynroh ka la khyllem biang hadien ka jingther jong u lapbah uba jur.
“Ka jingkhyllem ba manla ka por jong ka kynroh shisien ka sngi kan sa wanrah ïa ka jingjia ba sngewsih ïa ki mynsiem bakordor kiba shong basah hapoh ka dong. Ki paidbah ki sheptieng bha tang shu jur u lapbah. Ïa ka kynroh ba la shna da ki maw-it bad ym da ka kynroh kaba skhem wat haba la tip shai ba ka khyndew ka dei ka khyndew saw. Ïa ka jingujor yn sa phah sha ka Ministry tang shu thaw ïa ka sorkar thymmai ha Delhi,” ong u Marak.
U la ong ba ka lad kaba biang tam ba ïada na ka jingkhyllem ka kynroh ka long sa tang ban shna da ka kynroh kaba skhem ban ïada na ka jingshong synjor ka khyndew kaba lah ban wanrah shuh shuh ïa ka jingpynjulor ïa ka jingtei bad ïa ki nongshong shnong ba sah markhap.
Ïa ka jingtrei torti dei ban pynsangeh noh mardor bad dei ban thung da ka jingtohkit khnang ban ïada na kine ki jingjia kiba shisien ka sngi kin sa wanrah ïa ki jingjia ba sngewsih. Ki nongshong shnong ki shepting ïoh ba ka wan jia ka jingjia kaba lah ban jia ha ki sngi ki ban sa wan lada ki bor ba dei peit kim lah ban peitngor ïa ka jingtrei torti, la ong shuh shuh u Marak.
