Shillong, Nailur, 06: Ka Hynniewtrep Youths’ Council, Nongstoiñ Circle ba la lamkhmat da u President u Samla Redyfernandy Sunn ryngkat ka jingïadonlang jong ki nongïalam ka HYC West Khasi Hills District Unit ki la hiar biang sa shisien ha Ïew Nongstoiñ ban khynra ïa ki nongdih drok.
Ha u kyrwoh ba la phah sha ki lad pathai khubor, la pyntip ba ha ka jingkhynra ka seng ka la lap ba ki don kumba 25 ngut eiei ki samla kiba dang muja ban dih drok hapoh iew bad na ka liang jong ka seng ka la bat ïa kine ki samla ban sneng bad kyntu ïa ki bad hadien kata la bthah ba kin wan ïalam lang ïa ki bahaïing hasem ban ïakren bad la maham ruh ba kim bit shuh ban dang rung hapoh ïew Nongstoin namarba ka pynsyier ïa ki paidbah bad ïa ki nongshong ïew.
U Samla Redyfernandy Sunn u la pynrem ruh ïa ka Sorkar da kaba ong ba katkum ka jubab RTI ba la ïoh da ka HYC Sengkmie la pynpaw ba tang ha West Khasi Hills ki Pulit ki la ïoh kurup haduh 9.2 kilo u drok ha ki 4 snem eiei. Ka HYC ka la buh jingkylli ruh ïa ka tnad Pulit ha West Khasi Hills District da kaba ong ba ha ka jingïalang kaba la long hapdeng ka HYC West Khasi Hills, u Deputy Commissioner bad u Superintendent of Police la ïa kut ban ïaid pahara manla ka janmiet ha ïew Nongstoiñ ban shngaiñ ki nongshong ïew bad ki paitbah hynrei ka jingïakut kam shym la treikam satia kumba ladep ïa pynbeit.
