Shillong, Jylliew, 24: Ki Pulit ka Anti-Infiltration Directorate, ha ka Lah Sngi u Blei ki la pynlong ka jingkhynra ha kiba bun ki jaka trei bylla da ki bar jylla ha kylleng ka nongbah Shillong khnang ban lap ia ki bar jylla kiba wan bylla sha kane ka jylla Meghalaya khlem ki kot ki sla kiba biang.
Ha ka jingkhynra ha ka shnong Nongmensong bad ha Mawpat ba la lamkhmat da u Inspector Bah Syiemlieh ki Pulit ki la lap ba ki don katto katne ki nongbylla bar jylla ki don kiba biang ia ki kot kiba biang kum ka EPIC, ka Labour License bad Aadhaar Card ba pynshisha ba ki dei ki nong India bad ki don ruh katto katne ki bar jylla ki bym don ia ki kot ki sla hynrei ki don tang ia ka Aadhaar Card ba pynshisha ba ki dei ki nong India.
Ki Pulit ki la maham ruh lada lap ia ki nongbylla bar jylla ki bym don ia ki kot ki sla kiba biang, yn shu pynsangeh beit ia ka jingbylla bad yn shu phah noh ba kin leit biang sha ka shnong kaba ki wan.
La lap ruh ba bun na ki nongbylla bar jylla kiba trei bylla ki dei kiba wan na ka jylla Assam.
Kane kan dei ruh ka sien banyngkong ba ka tnat Pulit kan pynpaw paidbah ia ka jingkhynra ia ki nongbylla bar jylla kiba wan trei bylla ha kane ka jylla naduh ba ka Kong Idashisha Nongrang ka la shimti dang shen kum ka Director General of Police (DGP) jong ka tnat Pulit ka jylla.
