Shillong, Risaw, 13: U Superintendent of Police ka East Khasi Hills District Bah Vivek Syiem u la ong ba ka Special Investigation Team (SIT) haduh mynta ka dang tohkit ban lap ïa ka daw tynrai halor ka jingïap jyllop jong i heprit ba dang 4 snem ka rta ha ka shnong Nongrah hadien ba ki Pulit ki la kem noh ïa uwei u khynnah uba la 13 snem ka rta.
Kum ban shu pynkynmaw, i heprit kynthei ba la 4 snem ka rta i la jah rngai na phyllaw iing ha ka sngi u Blei ka 14 tarik Nailur, 2025 bad ïa ka met jong i la lap ba la pynthiah ha ka um ba lang ha kawei ka ing ba dang shna kaba don hajan ka iing sah jong i.
Ha ka jingïakren bad ki lad pathai khubor ha ka Lah Sngi U Blei u Bah Vivek Syiem u la ong ba ki Pulit kin dang tohkit bniah halor kane ka jingjia ban lap ïa ki jingshisha la ka dei ka jingïap i heprit ka lah ban dei na ka daw ka jingïaknieh ïa u biskit lane ka dei ka jingthmu ban leh beijot.
“Ka kaiphod postmortem ka pynpaw ba i heprit i la ngam jyllop. Hynrei ka SIT ka dang pynlong ïa ka jingtohkit ban lap ïa ka daw tynrai la ka jingïap jong i heprit ka dei na ka jingïaknieh ïa u biskit ne ïoh ka don da kawei pat ka jingthmu ban leh beijot,” la ong u SP.
Ha kaba ïadei bad ka jingïap jong u heprit 7 snem na ka shnong Nongrah u SP u la ïathuh ba ki Pulit ki dang ap ïa ka kaiphod Postmortem khnang ban pynshong nongrim ïa ka jingjia bad ban ïoh ruh ïa ka dur kaba shai kaba lam sha ka jingduhei jong une u heprit ïa la ka jong ka jingim.
Haba kylli, u SP u la ong ba haduh mynta ki Pulit ki dang tohkit ban lapdien ïa ki briew kiba donkti ban dkhat jubor ïa ka jingim jong u heprit 7 snem.
