Shillong, Nailur, 09: U Nongïalam ka Liang Pyrshah u Mukul Sangma ha ka Lah Sngi U Blei u la ïai ban ïa ka jingdaa ba dei ban thung da ka jingtohkit kaba laitluid halor ka jingkynnoh ba ka don ka jingpyndonkam ïa ka pisa beaiñ kaba la lum na u drok, ka na ka jingtih dewiong bad ki kam kontrak da ka National Peoples Party (NPP).
Kane ka jingdawa jong u Sangma ka long halor ka jingkynnoh da u President ka seng Congress u Bah Vincent H. Pala uba long ruh u MP barim jong ka Shillong ba ka NPP ka la pyndonkam da ka pisa ba la ïoh lum be-aiñ ban khwai ïa ki MLA jong kiwei pat ki seng saiñpyrthei.
“Ïa kino kino ki jingkynnoh, ngim lah ban shu sngap jar. Ngam tharai ba ngin shu klet noh kumto ïa ki jingkynnoh namarba ki jingkynnoh ki la mih. Namarkata, dei ban don ka jingtohkit kaba laitluid khnang ban pynshisha ba ki jingkynnoh la ki dei kiba shisha ne ki bym shisha, na ka bynta ban ïada ïa ka hok jong u paidbah bad ka jylla,” u la ong.
“Uno uno u lah ban kdewkti da ka jingkynnoh bad wat lada ki jingkynnoh ki long kiba shisha ruh ki lah ban lait,” la ong u Myntri Rangbah barim sha ki lad pathai khubor.
Haba kylli, u Sangma u la ong, “kam pher hynrei ka rukom treikam jong ngi kan long kaba pher bha. Ka kamram jong nga ka long ban pynbor ïa ka Sorkar India ban peit ïa ka jingshisha da kaba thung ïa ka jingtohkit kaba laitluid. Nga shai bha halor kata. Kaei kaba ki ong, kaei kaba kiwei ki ong bad kumno ki pyrshang ban ïada ïalade kam pher, ngan kyntu ïa ka Sorkar India ban thung da ka jingtohkit kaba laitluid.”
Ha kaba ïadei bad ka jingtwa jong kawei ka jingkieng ha rilum Garo ryngkat bad ka trok kaba kit shini, u la ong, “Namarkata, mano ba dei ban tohkit ïa kine kiei kiei namar kine ki dei ki kam runar ha shilynter ha khappud. Ki don bun kiwei pat ki jingai jingmut kiba nga la ïoh ha kaba ïadei bad ki kam runar ruser ha khappud. Ngi la don ha ka Sorkar la slem bha ha ki kyrdan bapher bapher. Mynta lada kino kino ki kam beaiñ ki jia ha khappud sngewbha ban pynthikna ba kam dei tang ha kawei ka kam.”
“Sngewbha husiar bha namarba ngi dei ka jylla kaba ïajan bha kiwei pat ki ri ka pyrthei, kumta yn ym don jaka ban shu hun katkum ka jingkynthoh namarba ka Sorkar India ruh ka peitngor ïa ki jingjia ha khappud. Kim lah ban sngap jar bad ngam khmihlynti ba kin sngap jar. Nga khmih lynti ïa ka jingkynthoh mardor bad nga don ruh ka daw baroh ban ngeit,” u la ong.
