Shillong, Jylliew 26 : Katkum ka khubor kaba la ioh lum na ka website jong ki pulit ka jylla kaba ki la thep ha ka website ha ka 25 tarik u Jylliew 2024, kine ki dei ki kam runar bad ki kam pyntriem kiba la jia ha kylleng ka jylla.
U bah Satisfyway Lyngwa u la ujor ejahar sha ki pulit pyrshah ia uwei u briew uba la tip kyrteng kum u Daniel Lyngdoh Mawphlang bad u la kynnoh ba ha ka 21 tarik u Jylliew 2024 u la tuh ia ka ar shaka jong u kaba don ia u Registration number ML-05W 3944 kaba u la pynieng ha Motphran.
U Thangkhanlal Lupho u la ujor ejahar sha ki pulit ba hapdeng ka miet jong ka 21 bad 22 tarik u Jylliew , ki nongtuh ki runar ki bym lah satia ban tip ki la rong tuh ia ka thuk thuk jong u kaba don ia u Registration number MN-01 AM 9968 na ka phyllaw iing jong u kaba don ha Fire Brigade, Motinagar-Shillong.
Ka kong Hamlen Sukhlain ka la ujor ejahar sha ki pulit ba ha ka 22 tarik u Jylliew ha ka por lai shiteng janmiet , ka la lap ba ki nongtuh ki la prong tuh ha iing jong ka kaab don ha ka shnong Sutnga Mission, East Jaintia Hills bad ki la rong tuh ia ka pisa 50 hajar tyngka bad ia ki jingdeng ksiar kiba shongdor kumba 4.5 lak tyngka.
Ha ka step jong ka 24 tarik u Jylliew 2024, u Waheh Chnong jong ka Thadmukoh kaba hap ha West Jaintia Hills District u la pyntip sha ki pulit da ka ktien ba u la lap ia uwei u briew uba la tip kyrteng kum u Sam Lyngdoh ba u la thiah iap lyngktar hajan ka iing sah jong u kaba don ha ka shnong Thadmukoh. Ha kane ka jingjia, u bah Kyrmen Lyngdoh u la ujor ejahar sha ki pulit ba da kaba kynnoh ba ia u Sam Lyngdoh la pyniap da ka lok jong u ka kong Sanli Lamare.
