Shillong, Naiwieng, 23: U MLA ka West Shillong Constituency u Bah Paul Lyngdoh ha ka sngi Saitjaiñ u la leit ban ïashim bynta ha ka Shillong Literary Fest kaba la long ha Wards Lake, Shillong bad thied ruh ïa ki kot ba la thoh da ki nongthoh kot kiba la pawnam bha kane ka thaiñ Shatei Lammihngi.
Ha ka jingïakren bad ki lad pathai khubor u Bah Paul u la ong ba kane ka Shillong Literary Fest ka long shisha kaba shongkhia bad ka long ruh kawei na ki dak kaba paw ba bun bha ki nongwan jngoh nabar ka jylla bad ha ka sien banyngkong ba ki ïohi ïa ki kot ba la thoh da ki nongthoh trai ri trai muluk.
“Nga ruh nga la wan ban ïashim bynta bad ban pynsngew bad pule ïa ki poitri jong nga sha ki nongsngap. Kiba bun na kine ki dei na shabar ki jylla ka thaiñ Shatei Lammihngi. Na ki ïew die kot ba don ha kane ka tamasa phin ba ki don ki kot kiba kham ñiar bad kiba kham thymmai,” u la ong.
“Nga la thied bun ïa ki (Kot) bad nga ngeit ba ka Library jong nga shimet kaba nga ju lum thup ïa ki kot kan nang kham riewspah shuh shuh,” la ong bad bynrap, ba ki kot ki u la thied ki dei kiba la thoh da ki nongthoh kot kiba tbit bha bad ïakynduh markhmat ruh ïa ki nongthoh kot kum u Jerry Pinto, u Sanjoy Hazarika bad u Ralte da kaba ong ruh ba ki dei ki nongthoh kiba la shempphang bha.
“Ha kum kane ka juk, ka jingdon jong kane ka tasama ka pynkynmaw ïa ngi ba ki kot ki dei ka spah bah kaba ïai neh ha ka pyrthei kaba ki briew ki la long mraw ïa ka mobile phone bad ka internet. Kane ka jingpynshlur ban pule ka dei kawei ka ban ïarap ba ki briew kin pynïar ïa ka jingmut jingpyrkhat jong ki bad ban phai biang sha ka por jong ka jingmutdur kaba lah ban wan tang lyngba ka kyntien ba la thoh ha ki kot,” u la bynrap.
Haba kylli, u la ong, “ki paidbah ki ud bha bad nga ki Book Store kiba nga la rung don ki kot kiba nabar kiba la ïathuh ba ki la lut noh hynnin ka sngi hi. Kata hi ka kdew ïa ka jingkhring jong kane ka tamasa pule kot.”
U la ai jingmut ruh ïa ki nongpynïaid ba kin pyrshang ha ka sien ka ban wan ba kane ka (tamasa pule kot) kan ym ïatakhuh bad ka por eksam jong ki khynnah skul bad kata hi kan khanglad ïa ki khynnah kiba dei ban pynkhreh ïa ki eksamin na kaba wan sha kane ka tamasa.
“Kane ka dei ka tamasa kaba ïapher na kiwei pat ki tamasa ka jingïarwai, jingïasiaw, ka jingïashad ka jingïakmen ka biang hynrei nalor kata ngi donkam ruh ïa ka jingjar jar bad ka jingkynjah ha ka jingpule kaba tei ïa ka bor jabieng bad ka bor jingmutdur jong u briew,” la bynrap shuh shuh u Bah Paul.
