Shillong, K’lyngkot, 07: Ki shipai BSF kiba ap pahara ha khappud kiba la ïoh ka jingtip kaba bniah na ki tnat syntiat ki la pynlong ka jingkhynra sawdong ka shnong Muktapur bad ha Lyngkhat, kaba hap hapoh ka West Jaiñtia Hills.
Ha ka jingkhynra ha ka Lah Sngi u Blei ki shipai BSF ki la ïoh kurup ïa ki mar khaii tuh kiba shongdor T. 34.15 lak. Ki tiar ba la ïoh kurup ki long ka shini, ka kiad, ki nep syiad, u rynsun, ki jingsleh pynbhabriew, ki dawai ïa kiba la thmu ban khaii tuh sha ka ri Bangladesh.
Katba ki shipai ki dang pynlong ka jingkhynra, ki la ïohi ïa ki briew ki bym lah ban ithuh durkmat kiba dang thmu ban leit sha khappud ban shimti ïa ki tiar. Da ka jingpynibor jong ki shipai, ki nongkhaii tuh ki la phet krad sha khlaw da kaba shim kabu ïa ka jingdum jong ka miet. Ïa ki mar khaii tuh la ïoh ban kurup na ka jaka ba ki snar khaii tuh ki la phet.
Ïa kine ki mar khaii tuh la aiti noh sha ka ophis Custom ban leh ïa kaba donkam katkum ki kyndon jong ka aiñ.
