Shillong, Nailar 16: Ka Khun Hynñiewtrep National Awakening Movement (KHNAM) ka la kynnoh ïa ka sorkar Meghalaya Democratic Alliance (MDA) ba ka la ïaleh kai politik ha kaba ka la pynslem ban pynlong ïa ki election sha ki 2 tylli ki autonomous district council (ADC) ha Khasi bad Jaiñtia Hills jong ka jylla.
Katkum ka jingong jong kane ka seng, ka la shim ïa ka rai ban thoh sha u Lat ka jylla u CH Vijayashankar ba un tuklar lem mardor ha kaba ïadei bad kane ka kam.
Halor kane haba kren sha ki lad pathai khubor u Working President ka KHNAM u Bah Thomas Passah u la ong, “Ngi pynpaw ka jingpyrshah kaba jur ïa kane ka jingleh jong ka sorkar ban pynslem ïa ka jingpynlong ïa ki election ha ki 2 tylli ki ADC. Kane ka dei tang ka buit politik ba la shim da kane ka sorkar naba ka kwah ban bat jubor ïa ka kam synshar ha ki ADC.”
“Ha ka synshar paidbah kadei jong ki paidbah, na ka bynta ki paidbah bad namar ki paidbah hynrei mynta ha ki ADC ha kine ki 6-7 bnai ba la leit, ki MDC kidei jong ka MDA, da ka MDA bad na ka bynta jong ka MDA bad ka samoi treikam jong ki ka la kut ha u bnai Rymphang mynta u snem,” u la ong.
Haba ong ba kane ka jingleh jong ka sorkar ban pynjlan shuh shuh ïa ka samoi treikam jong ki ADC kum ka jingpyrshang ban leh da ka bor jong kane ka sorkar, u Bah Passah u la ong, “Ngi pynpaw ïa ka jingsngewdiaw ba kane ka sorkar ka pyndonkam bakla ïa ka bor bad leh beaiñ da kaba pynjlan ïa ka samoi treikam jong kine ki ADC.”
“La donkam ïa ki MDC ba kim dei ban dawa wat ban ïoh ki tulop namar ka samoi treikam jong ki ka la kut naduh u bnai Rymphang mynta u snem bad lada ki dang bteng ban shim ïa ka tulop ka la long kaba beaiñ,” u la ong da kaba bynrap, “Namar kata ngi la rai ban thoh mardor sha u Lat ka jylla ba un tuklar halor kane ka kam naba kane ka sorkar ka la shim noh ïa ka hok ki nongshong shnong ban jied ïa ki MDC ba thymmai.”
U la ong ba kam don satia kano kano ka kam kaba kyrkieh ne ka jinglong jingman kaba kum kane ba kane ka sorkar kan pynjlan biang ïa ka por ne samoi treikam jong kine ki 2 ADC.
Haba kylli na ka liang u nongïalam ka KHNAM u la ong, “U Lat u la mynjur ïa ka jingai jingmut ban phiah ïa ki constituency, hynrei ki la bun pat ki shnong ki pyrshah ïa kane ka kam phiah constituency. Ngan ym kynnoh ïa ka delimitation committee naba ki la trei shitom ban pyndep ïa kane ka kam wat tang ha ka por kaba khyndiat. Kam dei ka kam kaba suk. Namar kata kane ka dei tang ka buit saiñ pyrthei ba la leh da kane ka sorkar ba ka kwah ban bat jubor ïa ka bor ha ki ADC.”
Shuh shuh u Bah Passah u la pynpaw ka jingtieng ruh ba ka jingthmu ban khmih bniah ne pynbeit thymmai ïa ka khyrnit kaba 6 jong ka riti synshar ka ri ba kane ka sorkar kan sa aidaw biang ban pynslem ïa ka election ha ki ADC.
