Shillong, Risaw 01: U President jong ka Voice of the People Party (VPP) u Bah Ardent M. Basaïawmoit u la ong ba ka party kumba ka la shim rai ha ka jingïalang jong ka State Executive Committee ka la bthah ïa baroh ki MLA jong ka party ba ki dei ban pyntreikam ïa ka MLA Scheme ha ka lynti kaba shai bad ba ki dei ban ai jingkheiñ sha u paidbah kumno la pynlut pynsep ïa kane ka skhim ba la mang.
Kane ka jingbthah kan long ïa ki lai ngut ki MLA jong ka party, u Bah Adelbert Nongrum, u Bah Brightstarwell Marbaniang, u Bah Heavingstone Kharpran bad kynthup ïa u Bah Ardent M. Basaïawmoit, ha kaba ki hap ban kohnguh ïa kane ka jingbthah jong ka party.
Haba kren ha ka jingïalang pynshai paidbah ïa ka nongrim jong ka party bad ruh ban pynrung dkhot kaba la pynlong ha ka shnong Lawbah, kaba hap hapoh Mawsynram Constituency ha ka sngi Saitjaiñ, u Bah Ardent u ong, lada kino kino ki MLA ka party ba kynthup ïa u ruh lada ki ïaid lait na kane ka jingbthah ka Party kan pynduh tiket beit ha ka elekshon MLA ka ban long biang ha u snem 2028.
U la kyntu ruh ïa ki paidbah ba ki dei ban ai da ka jingtip kaba shai ba ka MLA scheme ne kino kino ki kam pynroi kiba wanrah da u MLA kam dei satia ka kam leh isynei jong u hynrei ka dei hok ka bhah ba ki dei ban ai sha u paidbah kumba la mang da ka Sorkar.
