Shillong, Risaw 15: Ka jingshim rai jong ka Voice of the People Party (VPP) ban prat lynti sa sha rilum Garo ka la pynkhuslai jingmut ïa ki katto katne ngut ki nongïalam jong ka National People’s Party (NPP) kaba bat ïa u lakam synshar ha ka jylla.
U Myntri ka Sorkar Jylla u Rakkam A. Sangma ha ka sngi Baar u la kubur ba ka jingpynïar thapniang jong ka VPP sha rilum Garo kan long ka jingtynjuh kaba khraw bha ïa ka NPP.
“Manla ka seng saiñpyrthei la seng nongrim bad ka jingthmu bad ki kam. Haoid, kumba la kren da kiba bun, kam long kaba dei ban iehnoh ïa kano kano ka thaiñ ne ïa kano kano ka jaidbynriew. Namarkata, nga ngeit ba ki paralok jong ngi na ka VPP ki la sngewthuh ïa ka jingithiang jong ka jylla. Kumta ka jingkhih phaloh kaba ki la pynkhih ha ka elekshon MP ba ladep ha Shillong ka la ai bor bha ïa ki bad ka la jingkhih phaloh (ban poi sha ki paidbah ka rilum Garo),” la bynrap u Rakkam ha ka jingïakren bad ki lad pathai khubor.
“Ka biang bha ba mynta ki la pynïar ïa ki thapniang sha rilum Garo, hadoi, ngi tip ba ha ka saiñpyrthei, kan long ka jingtynjuh ïa ngi ha ka NPP ruh,” u la ong.
Shuh shuh u Rakkam u la kam ba bun na ki nongïalam na ka Congress bad na ka Trinamool Congress ha rilum Garo kiba dang ïakren ban leit pynïasoh sha ka VPP.
“Lehse lada ki trei bha, kan long ka jingtynjuh kaba khraw ïa ngi bad ngi ruh ngi hap ban sngewthuh hynrei ngin sa shim rai halor kane. Ka elekshon ka dei beit ka elekshon, ka politik ka dei beit ka politik, khlempep, ngi pdiang (ïa ka jingpynïar thapniang), ki paidbah kin bishar ïa kano ka rong kin jied. Ka dei ka jingïaid lynti kaba biang,” u la ong.
Haba kylli, u Rakkam u la ong, “ngan ïai ong biang kumba la jia ha u snem 2012, ki paidbah ki ong ïa ka NCP ka dei ka party Garo. Hato don mano mano mynta ban kren kumta. Em, kam long kumta. Ka shong ha ki nongïalam kumno ban trei bad kumno ban ai mynsiem ïa ki paidbah.”
