Shillong, Nailar, 19: Ki nonghikai skul SSA kiba don hapoh ka shatri jong ka Meghalaya SSA School Assocation (MSSASA) ha ka Lah Sngi u Blei ki la pynpaw ka jingsngew bynniaw halor ka jingsahkut ka tulop jong u bnai Naitung, 2024 na ka daw ka jingïakhih ba khlem pud sngi jong ki nongtrei SSA kaba dang bteng haduh mynta.
U President jong ka Association u Bah Aristotle Rymbai ha ka jingïakren bad ki lad pathai khubor u la ïathuh ba ha ka jingïakynduh ïa u State Project Director (SPD) u Swapnil Tembe ha ka 6 tarik mynta u bnai la pyntip ba ka jingslem ban pyllait ïa ka tulop ka dei namar ka jingïakhih jong ki nongtrei SSA.
“Ki nongtrei SSA Non-Teaching Staff ki don ka hok ban ïakhih hynrei kim donhok pat ban pynslem ïa ka tulop jong ngi,” la kynthoh u Bah Aristotle.
U la ong ruh ba kane ka jingpynslem ïa ka tulop ka long ka jingpynkheiñ ïa ka Article 21 bad ïa ka Article 300 (a) jong ka riti synshar ka ri kaba kren shai ba kino kino ki nongshong shnong ka Ri India kim donhok ban pynduh ïa ka bainong jong kiwei pat.
Shuh shuh u la ong ba ka Association ka dawa na ka Sorkar ba kan wad da kiwei pat ki lad ki lynti ban pyllait noh ïa ka tulop jong u bnai Naitung khnang ba kan ym ktah ïa ki nonghikai kiba shaniah ïa ka jingïoh tulop tang na ka kam hikai skul.
Ka MSSASA ka la pynrem jur ïa ki katto katne ki briew kiba kam ïalade ba ki dei ki dkhot jong ka Association kiba ong ba kam leilei lada slem ka tulop shi bnai haduh ar bnai.
