Shillong, Nailur, 17: Da ka jingthmu ban pynshlur ïa ka jingpathai khubor Online ryngkat ka jingkitkhlieh, ka Sorkar Meghalaya ka la wanrah ïa ka polisi bathymmai kaba bthah ïa ki riewshimet bad ïa ki kynhun ba ki dei ban pynrung kyrteng bad ka jylla shwa ban pathai ïa ki khubor ha ka rynsan Social Media.
Katkum ka jingpynbna ba la pynmih da ka ophis treikam jong ka Directorate of Information & Public Relations ka Sorkar Jylla ha ka 16 tarik Nailur, 2024 kane ka jingthmu ka long kum shi bynta ba la pyntreikam ïa ka Meghalaya Public Communication Policy 2024, kaba thawlad ban pynbeit ryntih ïa ka jingpynsaphriang ïa ki jingpathai jingtip ha ki lad pathai khubor Digital.
Hapoh kane ka jingbthah kaba thymmai, kino kino ki bym shym la ïoh jingithuh ne pynrung kyrteng hapoh ka ophis jong ka Directorate of Information & Public Relations (DIPR) ki dei ban aiti ïa ki jingtip jong ki sha kane ka tnad treikam ka Sorkar Jylla. Ïa ka jingpynrung kyrteng lah ban pyndep hi dalade ha ka ophis treikam jong ka DIPR lane da kaba phah lyngba ka email.
Ha kane jingpynbna, ka Directorate of Information & Public Relations ka la maham ruh ba kito ki bym bud ryntih ïa ka kyndon ban pynrung kyrteng shwa ban pathai ïa ki khubor ha ka rynsan Social Media yn kheiñ kum ka jingpynkheiñ ïa ka polisi, kaba lah ban shah pynngat ha ki kyndon aiñ. Ki bor sorkar ki la pynksan ba ïa kane ka polisi la shna khnang ban khanglad ïa ka jingpynsaphriang ïa ki jingthoh kiba lah ban ktah ïa ka bha ka miat jong ka jylla, ka shongsuk shongsaiñ, lane ka akor ka burom.
Kane ka sienjam kan long ruh kum ka jingpyrshang ban khanglad ïa ki jingpathai ïa ki khubor thok bad ki khubor hamsaïa bad ban wanrah ïa ka jingpathai jingtip Digital kaba khuid ba suba ha baroh kawei ka jylla Meghalaya.
