Shillong, Lber 20: Ka Deputy Commissioner ka East Khasi Hills ka kong R M Kurbah ha ka sngi Palei ka la banjur ïa ka jingdonkam ban don ka disaster management plan (DMP) ha ki ïing ki sem bad ki shnong ki thaw nalor ba ka la kyntu ïa ki paidbah ban kiar na ka jingpynkheiñ ïa ki aiñ shna ïing ne ka building byelaws.
Haba kren sha ki lad pathai khubor ha kaba ïadei bad ka mock drill exercise, ka kong Kurbah ba ka jingpynlong ïa ka exercise baroh ka long ban pynthikna ban don ka jingpynkhreh ban lah ban ïaleh pyrshah ïa kino kino ki jingshah pynjulor khamtam na u jumai da kaba buh ruh ha ka jingmut jingpyrkhat ba ka Meghalaya ka hab hapoh ka zone 5, kaba dei ka seismic zone kaba heh duh ha ka pyrthei.
“Kumta ngi donkam ban long kiba la khreh. Ngi kmen ba mynta ka sngi baroh ki kam ki la long kiba ïaid beit bha,” ka la bynrap.
Ka kong Kurbah, kaba dei ka chairperson jong ka district disaster management (DDMA), kumjuh ruh ka la ban jur ïa ka jingdonkam ban pynlong ïa ki jingpynsngewthuh paidbah ha ki shnong ki thaw, ki ophis bad ki skul ba kumno yn lah ban sumar haba wan ka jingjia khih jumai.
Ka la ong ba manla ki longïing ki dei ban don la ki jong ki disaster management plan. “Lada jia kano kano, ki dei ban shah hikai kaei ka sienjam kaba nyngkong ba kin shim haba ïadei bad ka jingshah pynjulor u jumai. Phi dei ban ïada shwa ïalade, da kaba leit rung hapoh ka meij. Kumta ngi donkam ban ai ki jinghikai naba kum kine phim ïoh jingtip beit kumto.”
Katkum ka jingong jong ka, ki longïing ki dei ban ïoh ki jinghikai ban sah ha ka jingïada nalor ka jingpynthikna ka jingpynbiang ka bam, ka um bad ki dawai bad ki jaiñ la kumno kumno ki ban neh haduh 78 kynta tat haduh ba ki bor pynïaid distrik ki la lah ban ai ïa ki lad jingïarap ba donkam.
Ka DC ka la kyrpad ruh ïa baroh ki dorbar shnong ba kin thaw ïa la ki jong ki disaster management plan.
“Ngi donkam ban ithuh ki jaka na ka bynta ki relief camp – kane manla ki shnong kidei ban don. Kidei ban don ki disaster management plan ha ki jaka jong ki,” ka la ong.
Halor ka jingtei ïa ki ïing ne ki building, ka kong Kurbah ka la ong ba ka donkam ban pynsngewthuh ïa ki paidbah, kiba tei ïa ki ïing kiba thymmai ba ki dei ban don ka jingpyrkhat kaba biang bad ba kidei ban kiar na ka jingpynkheiñ ïa ka building byelaws.
“Ngi ha ka zone 5, kaba long kaba ma ban tei ïa kino kino ki build kumta kita. Ki don ki building byelaws bad ki paidbah kim dei ban pynkheiñ ïa ki bad ki dei ban don ki plan ha ka por ba kitei ïa ki building kaba la khmih da u engineer naba udei u specialist halor kine ki kam,” ka la bynrap.
“Ki paidbah ki lah ban pyrkhat ba kane ka dei kaba la tuklar ïa ka jinglong shimet jong ki, hynrei phi dei ban pyrkhat ba phi wanrah jingma ïa ki paramarjan lada ka building jong phi ka khyllem,” ka la bynrap.
Kham ha shwa ïa ka mock drill exercise la pynlong hakhmat ki ophisar ka NDMA.
Ka kong Kurbah ka la ïathuh ruh ba ka bor pynïaid district ka la ithuh kumba 8 tylli ki jaka.
“Kine ki kynthup ïa ki jingjia twa khyndew, ka jingjia pluh ding ha kawei ka skul, ha petrol pump bad ki don ruh ki jingjia kum ka ïew ha ki jaka polo – kine kiba ngi la buh ki dei tang ban ïoh ki jingmut ba kumno ngi long kiba la pynkhreh,” ka la pyntip.
“Ngi tip mynta ïa ka nongrim ban don ka jingïadei bad kumno ngi ïaid lyngba ki hok jingtip naduh tynrai haba ki jingjia ki wan bad kiba la ïoh jingtip. Ngi shim ba lada ki jingjia ki wan kin ym don ki jingïakren lyngba ki laitnoh tang da ka MPRO bad kumjuh kiwei pat ki lad lada ngi don ha ka jaka. Ha kane ka sngi ngi la pyndonkam kawei ka line na MPRO haba ngi la leh baroh ki exercise bad ban ïohpdiang ïa ki lad jingtip ha kane ka kamra bad ngi sam ïa ki jingtip pat sha ki incident commander, ki ban phah pat ïa ki kynhun jong ki ambulance bad fire fighter,” ka la bynrap shuh shuh.
