Shillong, Naiwieng, 30: Ka Directorate of Dairy Development ha ka sngi Palei ka la rakhe ïa ka National Milk Day ha Central Dairy Campus, Mawiong ha kaba u Myntri ka tnat Animal Husbandry & Veterinary u A.L Hek u la long kum u Kongsan ryngkat ka jingsakhi lang jong u Secretary ka tnat A.H & Veterinary u S.C Sadhu kum u Symbud Kongsan.
Haba kren kum u Kongsan u Bah A.L Hek u la ong ba ka Meghalaya bad ka ri baroh kawei ka la rakhe ïa ka National Milk Day ban kynmaw burom ïa ka sngi kha jong u Dr. Verghese Kurien, uba long u Kpa jong ka White Revolution, uba la trei met bad mynsiem ban kyntiew bad ban pynkylla dur ïa ka Dairy Sector bad lyngba ki jingtrei shitom bad lyngba u synñiang u bynhei, ka kam ri masi khem dud ka la long kawei na ki lad aikam kaba pynmyntoi haduh katta katta ïa ki nongrep.
U la ong ba ha ki snem ba la leit noh, ki paidbah jong ka jylla ki la sdang ban sngewthuh ïa ka bynta bakongsan bad ka jingkoit jingkhiah na kaba dih ïa ka dud bad kiwei ki jingbam ba la shna na ka dud bad kane ka la wanrah ïa ka jingdawa kaba jur bha ban pynmih ïa ka dud. Watla ka Jylla Meghalaya Milk Mission, ki Dairy Farmers’ and Cooperative Societies kiba la sdang ïa ka kam ri masi khem dud ki la ïohi ïa ka jingkiew irat jong ka Dairy Sector bad ka la pynmyntoi bha haduh katta katta.
U Mynri u la pynpaw ruh ka jingkyrmen ba ha ki snem ban sa wan, ka Sorkar Pdeng kan sa wanrah kham bun ki skhim ban kyntiew shuh shuh ïa ka jingpynmih dud ha ka ri.
Ha kane ka sngi, u Myntri u la aiti ïa ki khusnam sha ki khynnah kiba ïashim bynta ha ki jingïakob bapher bapher bad ai khusnam ruh ïa ki nongri masi khem dud bad ïa ki Cooperative Society kiba la kiew bha ha ka jingpynmih ïa ka dud ha ka jylla.
