Shillong, Naitung 03: Ka jingkilan met ha ka sien kaba khathynriew hapdeng ki shipai India bad Mongolia lyngba ka Joint Military Exercise Nomadic Elephant ka la sdang ha ka sngi Balang, ha Foreign Training Node, Umroi. Kane ka jingkilan met kan long naduh ka 3 tarik haduh ka 16 tarik mynta bnai.
Ki shipai ka India kiba ïashim bynta kin long kumba 45 ngut kiba la mihkhmat da ka Battalion jong ka Sikkim Scouts ha ryngkat bad ki shipai bad ki bor pahara na kiwei pat ki shnat katba ki shipai ka Mongolia ki la mihkhmat haduh 150 ngut ki Quick Reaction Force Battalion.
Kane ka kilan met Nomadic Elephant ka dei ka jinghikai kaba la ju leh manla ka snem da ka ri India bad Mongolia. Ha ka edition kaba dang shudep mynshem snem la pynlong ha Mongolia u bnai Naitung, 2023.
Ïa ka jingsdang kane ka kilan met la shimbynta da u His Excellency u Dambajavyn Ganbold, Ambassador ka Mongolia sha India bad u Major General Prasanna Joshi, General Officer Commanding 51 Sub Area ki shipai ka India.
Ka jingthmu kane ka kilan met ka long ban pynkhlaiñ ïa ki shipai baroh artylli ki ri ban ïakhun ïa ki kam lehnoh ha kine ki jaka kaba hab ruh hapoh ka Sub Conventional kaba ha ka Chapter VII jong ka United Nations.
Ïa kane ka kilan met yn pynleit jingmut ha ki kam khynra kaba la tip ka semi-urban bad ki kam kiew lum. Ki kam kilan met ki kynthup ïa ka jingkhynra ïa ki kam lehnoh, ka Establishment jong ka Joint Command Post, ka Establishment jong ka Intelligence & Surveillance Centre, ban pynthikna ba kan don ka jinghikai ha ka kam shong ïa ki lieng ïapom, ha ki jaka hiar ki jaka liengsuiñ, ka jingpynrung ïa ki Drones bad ki Counter Drone System napdeng kiwei. La ong ba u Major General Gyanbyamba Sunrev, u Chief jong ki General Staff ki shipai ka ri Mongolia u ban shim bynta ha sngi kut ha ka 16 tarik mynta u bnai, 2024 ha ryngkat bad u Lieutenant General Zubin A Minwalla, General Officer Commanding 33 Corps ki shipai India.
Kane ka kilan met kan pynkhlaiñ ïa ka jingïatreilang hapoh ki kam ïada ri, kaba kynthup ïa ki jingïakren jingïadei paralok hapdeng kine ki artylli ki ri.
