Shillong, Risaw 26: Ka iew la ka dei ha kano kano ka jaka hapoh ka rilum Khasi bunsien la ju ñiew ba ka dei ka pliang-ja jong ka jaitbynriew hynrei katba ki shalyntem ka por ki nang tyllun ka iew ka la kylla long pynban ka pliang-ja jong ki briew kiba nabar ka jylla bad ia kane la sakhi wat hapoh Iewduh bad ha Khyndai Lad kiba long ki ar tylli ki kad khaii kiba heh tam ha kane ka Jylla Meghalaya.
Halor kane, da ka jingsngew khia ka Hynñiewtrep Youth Council (HYC) West Khasi Hills District ha ka sngi Palei ka la iakynduh kyrpang ia u Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem ban un bthah ia u Syiem jong ka Hima Nongstoin ba ki Rangbah Shnong kim bit shuh ban dang ai ia ka No Objection Certificate (NoC) sha ki bar jylla kiba kwah ban leh ia ka kam khaii pateng hapoh u pud u sam jong ka Hima Nongstoiñ.
Ha jingiakren bad ki lad pathai khubor, u Bah Lumlang Khar Syiemlieh u la pynpaw ba mynta ka Iew Shahlang ka la shah knieh noh ha ki bar jylla kiba la don 70 na ka 100 bad long trai ruh ia ki dukan kiba heh katba ki Khasi hap ban shong die jingdie ha madan.
Ka Seng ka la pynsngew ruh ha u CEM ka KHADC ia ka jingkynrei jong ki Karkhana beain ha West Khasi Hills kiba ioh NoC na ki dorbar shnong, da kaba ai nuksa ia ka Ms. D. Ferro Alloy kaba la iaid shaid shaid ban trei hapoh ka West Khasi Hills.
Nalor kine, ka seng ka la kyntu ia ka District Council ba kan peit bha ia ka jingdon jong ka khyndew ka shyiap hapoh ka West Khasi Hills namar kumba ka long mynta la lap ba bun na ki jaka ki puta ki la hap noh ha ka jingpeit jong kiwei khamtam ha ki jaka khappud.
“Ban pynkhlain ia ka khaii ka pateng jong ki trai ri, khamtam ha ki thain khappud kumjuh ruh ia ki iew kiba la rim kiba don ha khappud,” la dawa ka seng bad bynrap, “ban bthah ia ki Hima, ki Sirdarship, ki Dorbar Shnong ba kim dei shuh ban ai NoC pathar ia ki poiwir kiba leh ia ka khaii ka pateng hapoh ka thaiñ (West Khasi Hills) bad kumjuh ruh ban ioh rung ha ki iew ki hat.”
Nalor kine, ka HYC ka la kyntu ia ka KHADC ban bthah ia ki Hima, ki Sirdarship, ki Dorbar Shnong ba kin ym pdiang ia ki song pynroi na kiwei ki jylla kum na ka Sorkar Assam khamtam ha khappud lane ban ai ia ki jaka puta sha kiwei ban leh kam eiei. Ban pyrkhing ia ka jingiap pathar ki dohkha bad ban pynkhlain noh ia ka jingthung ia ki tynrai dieng bad ban thaw ia ka Plantation Committee ka ban peit thuh ha khappud.
Ka seng ka la kyntu ia ka KHADC ba kan bthah ia ki Hima, ki Sirdarship, Dorbar Shnong ban ym ai No Objection Certificate (NoC) sha ki briew kiba nabar kiba shah thungkam lyngba ka Post Gramin Dak Sevak (GDS).
Kawei na ki mat kaba kongsan, ka seng ka la pynsngew ba ka District Council kan shimkhia ban shna noh ia ka Tirot Sing House khnang ba ki paidbah kiba wan na ki shnong nongkyndong sha Sor Shillong ban wad jingsumar kin iohlad ban pyndonkam ia kane ka ing kum ka iing basa.
Ka seng ka la kyntu ia ka Council ban don noh da ka Traditional Dress Day jong ka KHADC ban pynneh pynsah ia ka riam tynrai.
