Shillong, Nailar, 26: Ha kawei na ki jingjia kaba pynlynngngoh ïa kiba bun balang, ki Pulit ka Jylla Meghalaya kiba don kumba 15 ngut bad kiba ap pahara ha ka shnong Lapangap kaba don ha khappud jong ka Jylla Meghalaya bad Assam, ki la shah kthong ha ki jaidbynriew Karbi ha ka sngi Saitjaiñ.
Ha ki video ba la saphriang ha ka rynsan Social Media, la ïohi ba ki Pulit ka Jylla Meghalaya katba ki dang pahara ha kane ka jaka ki la shah kthong ha ki jaidbynriew Karbi kat haduh ba ki la hap ban phet kham sha jngai khnang ban lait na kino kino ki jingjia ba sngewsih.
U Waheh Shnong jong ka shnong Lapangap haba ïakren bad u nongthoh khubor u la pynshisha ruh ïa kane ka jingjia kaba la jia ha kane ka shnong kaba don ha khappud.
La iohi ruh lyngba ka Video ba ki Pulit ka Jylla Assam ki la poi ban iakren bad ki Pulit ka Jylla Meghalaya ha kaba ki la kyntu ba kim dei ban ailad ïa ki Khasi Pnar ban tur sha ka jaka ba shong basah ki Karbi bad na ka liang jong ki Pulit ka Meghalaya ki la pyneh ba ong ruh ïa ki Pulit Assam ba kin tehlakam ïa ki Karbi ba kim dei ban tur sha ka shnong ba shong basah ki Khasi Pnar.
Ka jingïakynad hapdeng ki Khasi-Pnar bad ki Karbi ha ka shnong Lapangap ka la jia hadien ba la kynnoh ba ki jaidbynriew Karbi ki la jynrat naphang ïa ki tynrai dieng ba la thung da ki Pnar ha u Lum Moo Pyrdet Pynthor ban pynskhem ïa ka jinglong trai ïa kane ka jaka.
Hadien ba la mih kane ka jingïakajia hapdeng ki Khasi Pnar bad ki Karbi, ka tnat Pulit jong ka West Jaiñtia Hills ka la pynap pahara da ki Pulit ha kane ka jaka ban pynneh ïa ka shongsuk shongsaiñ manla ka sngi.
U Waheh Shnong u la ïathuh ba ki Karbi kiba don da ki phew ngut ki la rah da ki dieng bad kawang da ki maw bad siat ruh da ki jri ïa ki Pulit ka Saitsama Out Post kiba ap pahara ha ka shnong Lapangap.
U la ïathuh ruh ba ka Dorbar Shnong ka la shong jingïalang kyrkieh ryngkat ka jingdonlang jong u Superintendent of Police ka West Jaiñtia Hils u Bah C. Syrti, u Additional SP, u Inchage jong ka Saitsama Police Outpot, u MDC jong ka Pynthor-Mukroh Constituency u Bah Arboi Shadap ban ïakren halor kane ka jingjia mynta ka sngi.
U la ïathuh ba ka Dorbar Shnong ka la pynpaw ba kan sa pynsngew ïa kane ka jingjia bad ïa ka jingbuh ktem jong ki Pulit Assam ha u Lum Umshyrngat uba dang hap hapoh u pud u sam jong ka shnong Lapangap.
“Ngi la rai ban sa pynsngew sha u Deputy Commissioner ban phah weng noh ïa ka Camp jong ki Pulit Assam ha u Lum Umshyrngat namar ba ka dang hap hapoh u pud u sam jong ka shnong Lapangap. Ngin ïaishah bad ki bor synshar District bad lada kim leh eiei ngim banse ban pynpra hi da ka bor shnong,” u la ong.
Shuh shuh u la ïathuh ba ka Dorbar Shnong ka la pynpaw hakhmat u SP ba dang donkam shuh shuh ïa ki Pulit ban pahara ha khappud jong ka Shnong Lapangap khnang ban ai jingïada ïa ki paidbah kiba leit trei sha ki bri ki bsa ha ka por mynsngi mynshai.
