Shillong, Nailar 26: Ha kawei na ki jingjia kaba pynlynngngoh ia kiba bun balang, ki Pulit ka Jylla Meghalaya kiba don kumba 15 ngut bad kiba ju ap pahara ha ka shnong Lapangap kaba don ha khappud jong ka Jylla Meghalaya bad Assam, ki la shah kthong ha ki jaidbynriew Karbi ha ka sngi Saitjaiñ.
Ha ki video ba la saphriang ha ka rynsan Social Media, la iohi ba ki Pulit ka Jylla Meghalaya katba ki dang pahara ha kane ka jaka ki la shah kthong ha ki jaidbynriew Karbi kat haduh ba ki la hap ban phet kham sha jngai khnang ban lait na kino kino ki jingjia ba sngewsih.
U Waheh Shnong jong ka shnong Lapangap haba iakren bad ka BatesiTV u la pynshisha ruh ia kane ka jingjia kaba la jia ha kane ka shnong kaba don ha khappud.
Ka jingiakynad hapdeng ki Khasi-Pnar bad ki Karbi ha ka shnong Lapangap ka la jia hadien ba la kynnoh ba ki jaidbynriew Karbi ki la jynrat naphang ia ki tynrai dieng ba la thung da ki Pnar ha u Lum Moo Pyrdet Pynthor ban pynskhem ïa ka jinglong trai ïa kane ka jaka.Hadien ba la mih kane ka jingiakajia hapdeng ki Khasi Pnar bad ki Karbi, ka tnat Pulit jong ka West Jaiñtia Hills ka la pynap pahara da ki Pulit ha kane ka jaka ban pynneh ia ka shongsuk shongsaiñ manla ka sngi.
