Shillong, Jylliew, 24: Ka seng kieng atiar Hynñiewtrep National Liberation Council (HNLC) ha ka sngi Saitjaiñ ka la kyrpad ia ka Sorkar ba kan weng lut pyrshah ia ki mukotduma leh kam bymman ba la rejistar pyrshah ia ki nongialam bad ia ki dkhot khnang ban dup lah ban pyntyllun shakhmat ia ka jingiakren iasuk.
Ka Seng ka la rah ia kane ka mat jingdawa ha ka sien shong iakren iasuk kaba baar kaba la long bad ki ksiang ba la thung da ka Sorkar Pdeng bad ka Sorkar Jylla.
Ha kane ka jingialang, la mihkhmat da u ksiang ba la thung da ka Sorkar Jylla u Bah Peter S. Dkhar (Retd IAS) bad u Advisor jong ka Ministry of Home Affairs (MHA) Northeast u A.K. Mishra (Retd IPS), bad hynñiew ngut ki dkhot jong ka seng HNLC ba kynthup ia u Vice Chairman u Bah Manbhalang Jyrwa, u Political Secretary u Bah Aristerwell Thongni, u Foreign Secretary u Bah Phrangkupar Diengdoh bad ki PSO ba kynthup ia u Bah Rymphang Marweiñ, Bah Storgy Lyngdoh, Bah Aiborlem Marbangiang bad u Bah Raymond Lapang.
Haba kren sha ki lad pathai khubor, u ksiang ba la thung da ka HNLC u Bah Sadon K. Blah uba long ruh u President ka HNYF, u la ong, “ngi la iathir iatai mynta ka sngi halor ka jingdonkam ban plie ia ka jingkhang iakren iasuk ka ban tyllun shakhmat bad (ban leh ia kane) ka Sorkar ka dei ban weng lut ia baroh ki jingpynngat mukotduma leh kam bymman pyrshah ia ki nongialam ka HNLC bad ia ki dkhot.”
U la ong ba ka seng ka la kyrpad ban map lut ia baroh ki mukotduma ba la mudui pyrshah ia ki nongialam ka seng bad ia ki dkhot da ka Sorkar Pdeng bad ka Sorkar Jylla.
Ka don tang kawei ka mukotduma ba la rejistar bad ba la pynngat kyndon da ka National Investigation Agency (NIA) pyrshaj ia ki nongialam ka Seng kiba kynthup ia u Chairman u Bah Bobby Marweiñ bad ia u General Secretary-cum-Publicity Secretary u Bah Saiñkupar Nongtraw.
U Bah Sadon u la pyntip ba ki nongmihkhmat na ka Ministry of Home Affairs (MHA) bad ka Sorkar jylla ki la pynpaw ba kane ka kam kan shimpor la kumno kumno shitaiew ia ka sorkar ban pyrkhat khamtam ha kaba iadei bad ka jingmap ei ia baroh ki mukotduma.
U la pyntip ba ha kane ka jingiakren ki lai liang mamla, ka Sorkar ka la tyrwa ia ki katto katne ki jingai jingmut. “Mynta ka sngi, ngin sa shong jingialang ban iakren halor ki jingtyrwa ba ngi la ioh na ki bor Sorkar bad shen ngin shong ia ka jingialang ban shim ia ka rai bad hadien kata ngin saphah jingtip sha ki bad ma ki ruh kin sa ai jingpyntip sha ngi,” la bynrap u Bah Sadon.
Da kaba pynpaw ba ka HNLC kam pat warnah ia ki Political Agenda sha ka miet jingiakren u Bah Sadon u la ong, “kane ka dei namarba ngi dang ap nyngkong eh ia ka jingkhang ba kan plie shwa ba ngin pyntyllun shakhmat ia ki political agenda ki bym lah ban shu pyndep noh tang hapoh shisngi ne ar sngi. Haba nga ong ia ka jingkhang kaba dang donkam ia ka jingiakren halor ka political agenda ka long ba baroh ar tylli ki sorkar ki dei ban pdiang ia ka jingmap ei ia ki jingpynngat kam bymman bad ban weng lut ia baroh ki mukotduma la ha kano kano ruh ka dur kaba ki lah ban leh na ka liang jong ki khnang ba ngin dup lah ban iaid shakhmat.
