Nongstoiñ, Jylliew, 24: Ki paidbah nongshong shnong jong ka thaiñ Umkyllaiñ kaba don kham harum ka sor Nongstoiñ ha ka sngi saitjaiñ ki la lap ia kawei ka metiap kaba la per ha ka jaka pynlang um ne ka check dam kaba don ha ka wah Umkyllaiñ kaba hap hapoh ka shnong Urkali West Khasi Hills District.
Mar mar ki paidbah ki la pyntip ia kane ka jingjia sha ki nongïalam jong ka shnong Urkali kaba la pyntip noh sha ki pulit jong ka Nongstoiñ Police Station kiba la leit ban pyndep ia ki jingdonkam katkum ka ain.
Ka thymmei khubor ba la iohlum na ki Pulit ka la iathuh hadien ba la peit bniah ia kane ka metiap la lap ba ka dei jong uwei u rangbah uba la phet na Civil Hospital Nongstoiñ ia uba la tip kyrteng kum u Bah Starsis Langrin, uba la 34 snem ka rta na ka shnong Shallang Sohbar, West Khasi Hills.
Kum ban shu pynkynmaw ba ha ka 21 tarik u Jylliew 2023, ha ka por kumba 9:30 baje mynmiet une u rangbah u la phet na Civil Hospital Nongstoiñ hadien ba la wan buh ia u da ki bahaiing ban phah sumar.
Ki Pulit ki la pyntip ba la leh ruh ka Post Mortem ban lap ia ka daw halor ka jingiap jong une u rangbah ha katei ka jaka.
