Shillong, Rymphang, 06: Ki nongtrei jong ka Mawmluh Cherra Cements Limited kiba don hapoh ka shatri jong ka Mawmluh Cherra Cements Employees’ Union (MCCEU) ha ka jingïakynduh ïa u Myntri Rangbah ka jylla u Conrad K. Sangma ha ka sngi Palei ki la kyrpad ban pyllait ïa ka jingïarap pisa hapoh ka special scheme ha ki ar bynta lane ar Installment.
Haba kren sha ki lad pathai khubor, u President jong ka Union u Bah Pynskhem Lyngdoh u la ïathuh ba ka Sorkar ha kaba sdang ka la tyrwa ban pyllait ïa ka jingïarap pisa ha ki lai bynta ne lai installment hapoh ki lai snem.
U la pynshai ruh ba ki nongtrei jong ka MCCL ki khmihlynti ban ïohpdiang ïa ka jingïarap pisa kumba T.14 lak hynrei kumba ka long mynta ka jingpyllait pisa kaba tang 4 lak shi snem ka la buh jingeh ïa ki nongtrei.
Ka Union ka la ai jingmut ruh ïa u Myntri Rangbah ka la ai jingmut ban pynkylla noh ïa ka karkhana Mawmluh Cherra Cements Limited (MCCL) sha ka Industrial Training Institute lane ka Vocational Training Center, namarba ki tiar ki tar kiba rim ki dei kiba la don lypa hapoh kane ka karkhana ba ka sorkar ka la pynbna ban khang khyrdep noh 31 tarik, Nohprah, 2024.
U Vice President jong ka Union u Bah S.K Dkhar u la ong da kaba wanrah ïa ka projek ba thymmai kan plie ïa ka lad ïohkam ïa ki trai shnong ka shnong Sohra.
