Shillong, Risaw 29: Ki Pulit jong ka Khliehriat Police Station kiba la ïoh ïa ka jingtip kaba bniah ha ka sngi u Blei ki la pynlong ka jingpynap ktem ha ka por 11.30 baje mynstep bad ïoh kurup kurup 274.23 gram u drok Herion uba shong dor T. 1.5 klur.
Ïa une u drok la pyrshang ban khaïi be-aiñ da uwei u snar khaïi drok uba la tip kyrteng kum u Rofique Uddin Ahmed na ka shnong Telitakar Part 11 Katogora PS, Catharines.
U Superintendent of Police jong ka East Jaiñtia Hills District, u Jagpal Singh Dhanoa, ha u kyrwoh ba la phah sha ki lad pathai khubor la ïathuh, ki Pulit kiba la ïoh ïa ka jingtip kaba tikna ba don uwei u nongkhaïi drok uba kyrteng u Rofique Uddin Ahmed uba shong da ka Bos Nightsuper kaba don u registration number AS-01-FC-7788, uba la rah lang u drok mar mar ki Pulit ki la pynlong ïa ka jingpynap ktem ha surokbah NH-6 hajan Khliehriat Police Station.
Dei ha ka por 11.30 baje mynstep ki Pulit ki la ïoh bat ïa ka Bos Nigh Super bad ïa u snar khaïi drok uba shong hapoh kane ka bos. Ha ka jingtalasi ryngkat ka jingsakhi lang jong ki riewpaidbah kum ki nongsakhi la kurup ïa u powdar ba long rong stem ba la song bha ha ki 20 tylli ki synduk sabon bad hadien ba la leh tes la pynshisha ruh ba u dei u drok heroin.
Ki Pulit ki la kurup noh ïa u drok bad kawei ka Mobile Phone bad kem noh ruh ïa u Rofique Uddin Ahmed. Ki Pulit ki la register case ha Khliehriat Police Station hapoh ki kyndon jong ka aiñ NDPS Act. Ki Pulit ki dang pynlong ïa ka jingtohkit khnang ban lap dien shuh shuh ïa kiba donkti.
