Shillong, Naiwieng, 02: Ki Pulit jong ka East Khasi Hills District kiba la pynlong ka jingkhynra ha ka miet sngi thohdieng ki la ïoh kurup 1538.8 litar ka Beer, 43775 litar ka kiad IMFL bad 270 litar ka kiad pyrsi na ki bynta bapher bapher ba la die be-aiñ bad ïa kine ki jingdih pynbuaid la pynjulor noh ha ka jaka ba la ïoh kurup.
U Superintendent of Police jong ka East Khasi Hills Bah Sylvester Nongtnger ha u kyrwoh ba la phah sha ki lad pathai khubor u la ong, kane ka jingkhynra jong ki Pulit ka long ban shim ïa ki lad ki lynti ban tehlakam ïa ka shongsuk shongsaiñ.
U la ïathuh ba ki Pulit ki la pynlong ka jingïaid pahara bad ban khynra ïa ki kali.
“Ha une u bnai Nohprah bun ki tamasa kin sa nang wan. Ban khanglad ïa ki jingjia basngewsih, ki Pulit ki la shim ïa ki lad ki lynti ban pynlong ïa ka jingkhynra ha ki bynta bapher bapher jong ka nongbah,” ula ong.
U SP u la ïathuh ba ka jingtalasi bad pynngat kyndon ïa kiba buaid bad ïa kiba niah kali khlemakor la ka long ïa ki nongñiah kali saw shaka lane ar shaka kan dang ïai bteng khnang ban ïada ïa ki jingjia aksiden bad ka jingduhei ki mynsiem briew.
