Shillong, Jymmang, 21: Ki Pulit jong ka Anti Narcotic Task Force ka East Jaintia Hills District ha ka 21 tarik u Jymmang, 2024 ki la ioh ban kurup ia u drok uba shongdor haduh 5.5 klur hadien ba la iohkem ia ki snar nongkhaii drok kiba wanrah ia u drok shapoh kane ka jylla Meghalaya.
Ka tnat Pulit ka la pyntip ruh ba hapoh ki 30 sngi, ki Pulit ki la ioh ban kurup ia u drok uba shongdor haduh 20 klur.
Katkum u kyrwoh ka tnat Pulit, la pyntip ba na ki snar nongkhaii drok la ioh ban kurup 58 tylli ki synduk thep sabon ba la thep ia u drok uba shongdor 5.5 klur.
Kane ka jingioh kurup jong ki Pulit ia une u drok ka la jia tang hapoh 24 kynta ba ka Kong Idashisha Nongrang ka la shimti kum ka Director General of Police ba thymmai jong ka Jylla.
