Shillong, Jymmang, 21: Ia ka met jong u Bah Ron Cooper Massar la lap ha ka sngi Baar na wah Umïam kaba la per ha sla um hadien ba u la jah naduh hynnin ka Lah Sngi u Blei ha ka por kumba 4:00 baje mysntep katba u dang mih na la ing ban leit iaid kai step.
U Bah Ron uba trei kum u Junior Engineer ha ka tnad Water Conservation, Shillong u dei uba shong basah ha ka shnong Umroi Jaïaw Pdeng kaba hap ha ka Umroi PIC, Umïam Police Station.
Halor ka jingjah jong une u rangbah ki bahaing hasem ki la ujor da ka ejahar ha Umroi PIC.
Ia ka met jong u Bah Ron la sei na ka wah da ka jingïarap ki Pulit bad ki nongshnong shnong ha kaba la pynkit noh sha Civil Hospital Nongpoh ban pyndep ïa ka postmortem.
Ki Pulit ki dang pynlong ruh ïa ka jingtohkit watla ki la suba ba u ïap na ka jingngam jyllop khnang ban tip ïa ka daw jong ka jingshisha.
Na ka liang jong u Bah Lister Massar uba dei u para jong u Bah Ron, u la ong ba kum ka ing ka sem kim don satia ia kano kano ka jingsuba ba u shah pynïap bad ki shu ngeit ba ka lah ban dei ka jingbakla ba u la kum ur sha wah.
U la iathuh ruh ba hymmen jong ki, u dei u briew uba bha bad uba ym pat don dak sniew ha ka imlang ka sahlang bad kum u rangbah u dei uba ju mlien ban mareh step.
