Shillong, Rymphang, 01: Ki shipai BSF kiba pahara ha khappud ki la iohkem ia ki arngut ki nongdie kyiad bad ioh kurup ruh 356 bilor ka kyiad kaba la thmu ban khaii tuh sha Bangladesh.
Ha u kyrwoh, ki BSF ki la pyntip ba ha ka sngi balang hadien ba ki la ioh jingtip bathikna ki la pynlong ia ka jingpynap shrip bad ki la iohbat ia kawei ka kali bad ha ka jingtalasi la lap ba la kit da ka kyiad bad kumta ki la kem noh ia u nongñiah bad ia u nongbud jong ka kali kiba dei ki nong India bad la kurup noh ia ka kyiad kaba don hapoh kali.
Ki BSF ki la iathuh, ba ia ka kyiad la thmu ban khaii be-aiñ sha ri Bangladesh lyngba ka thaiñ khappud kaba don ha West Jaintia Hills District.
Ia kiba la shah kem ryngkat bad ka kyiad kaba la kurup la aiti noh sha ka ophis Custom kaba don ha Dawki na ka bynta ban leh ia kaba donkam.
