Shillong, Rymphang 01: Ka BJP Meghalaya Pradesh ha ka sngi Balang ka la pynkha ia ka Scheduled Tribe Morcha ha ka jingialang kaba la long ha ophis treikam jong ka party ha Bivar Road.
U President jong ka ST Morcha u Thomas Marak u la pyllait paidbah ruh ia ka ‘vocal for local’ programme kum shi bynta ka “gaon chalo abhiyan” ban pynpoi sha baroh ki shnong kiba don hapoh ka jylla Meghalaya.
La thaw ia ka ST Morcha da ka party khnang ban peit ia ka bha ka miat jong ki trai jylla da ka BJP, Meghalaya Pradesh.
Ha kane ka sngi, u State President ka party u Rikman G. Momin, u la pdiang burom ia ki nongkitkam jong ka ST Morcha, ia ki District President bad District Committee sha ka party.
U State President u la ai ruh ka jingkular ba ka party kan ai jingkyrshan borbah ia ka ST Morcha.
“Ban pynthikna ia ka bha ka miat jong ki trai jylla, ka ST Morcha, kan pynlong ia ki prokram bapher bapher ha ka jylla, da kaba leit sha manla ki shnong bad ban ai jingpynshai shahang ki skhim jong ka Sorkar Pdeng bad ban pynthikna ba ki nongshong shnong kin ioh ia ki jingmyntoi.
