Shillong, Naitung 03: Ka Shad ñiam Behdieñkhlam kaba ju long shisien shisnem jong ka Seiñ Raij Jowai ka la kut noh hapdeng ka jingiphuh iphieng ba la ïa shim bynta da ki khun ka Seiñ Raij Jowai ha ryngkat ka shad ka kmen bad ka put ka tem.
Ha kane ka sngi, la sakhi lang da u Myntri Rangbah ka jylla u Conrad K. Sangma, u Myntri ka tnat Jngohkai Pyrtei Bah Paul Lyngdoh, ki MLA ba kynthup ïa u Bah Shanbor Shullai, Bah Wailadmiki Shylla, Kong Santa Mary Shylla, ki MDC, u Deputy Commissioner ka West Jaiñtia Hills Bah B.S. Sohliya, u Superintendent of Police Bah C. Syrti, ki ophisar Sorkar ryngkat ka jingdonlang u President ka Seiñ Raij Jowai Bah H. Toi, u General Secretary Bah A. Sumer nalor kiwei de.
Ïa kane ka shad ñiam Behdieñkhlam kaba la khot ruh kum ka ‘saw sngi lai miet’ la pyndep ïa ki jinglehñiam naduh ka nguh ka dem, ka suit ka shor, ka jingpyndep ïa ka Siang ka Pha, ka jingleit rah ïa ka Symbood Khnong, ka Khnong Blai, ki Deiñkhlam, ka bam tyngkong, bad kiwei de ki kam ñiam kam rukom ba la pyndep da u Dolloi ka Elaka Jowai, u Langdoh, u Pator bad ki Waheh Wasan.
Baroh ki Rot kiba la wan pynpoi ha kane ka sngi pynkut hapoh ka Syiem Aitnar ki don haduh 14 tylli, ïa kiba la shna kyrpang da ki dong bapher bapher hapoh ka Kmai Raij kumjuh na ka Seiñ Ummulong, ka Seiñ Raij Shillong nalor kiwei de.
Mynta u snem ha ka jinglehniam naduh ka por mynstep ka la don ka Bam Tyngkong ha ïing Langdoh, ka kynting khnong ka Loompyrdi ha ïung Langdoh, ka Sympat ïung, katba haka por nongphai sngi kaba dei ka bynta ba kongsan jong ka lehñiam la pynhiar ïa ka Deiñkhlam, ka Kymbood Khnong, ka Khnong Blai bad ki rong ki rup kiba don 14 tylli la pynpoi ha pung ka Syiem Aitnar da ka jingsakhi lang jong ki hajar ngut ki nongwan peitkai kiba dei na kylleng ka Ri Khasi Jaiñtia.
U Conrad K. Sangma haba kren ha kane ka sngi u la pynpaw ka jingsngewkmen ban wan sakhi lang ïa kane ka shad Behdieñkhlam ha ka sien kaba lai, ula pynsngew ruh ba ka jylla Megha laya ka long kaba riewspah bha ha ka riti ka dustur jong u barim bajah.
