Shillong, Jylliew, 27: U nongaiktien jong ka Sorkar MDA u Bah Paul Lyngdoh uba long u Myntri ka Sorkar Jylla ha ka sngi Thohdieng u la ong ba ïa ki notice ladep ban phah lyngba ka Town Vending Committee sha ki nongdie madan. Kumba 400 ngut ki nongdie madan ba ladep ban ithuh hadien ba la jied bad bishar thik pathik katkum ki kyndon.
Ka jingkren jong u Bah Paul ka long hadien ba ka Sorkar Jylla ha ka 21 tarik mynta u bnai ka la ithuh ïa ka mala ba shajrong jong ka Meghalaya Urban Development Authority kum ka ‘vending zone’ bad ka jaka ba ju shong ki nongdie madan ha Khyndai Lad la pynbna kum ka ‘no vending zone’.
“Ngi sngewthuh bha ka jingdon jong ki nongdie madan ka la pynwit haduh katta katta ïa ki paidbah kiba pyndonkam ïa ki lynti ïaid ha Shillong bad ki lynti ïaid ha Shillong kim dei kiba la shna tang na ka bynta kawei ka kyrdan jong ki briew kiba pyndonkam ïa ka surok,” la ong u Bah Paul ha ka jingïakren bad ki lad pathai khubor.
U Bah Paul u la ong ïathuh ba ka jingaipor khatduh ïa ki nongdie madan ban mih noh ka la kut, bad mynta ka aiñ kan sa leh ïa la ka jong ka kamram.
U la ong ba ïa ki jaka shong die jingdie ladep ban bhah sha ki nongdie madan bad ka shong ha ki mynta ban pdiang ne ban kyntait ïa ka jingtyrwa.
U Myntri u la ong ruh ba ki surok ha Shillong kim dei kiba la shna tang na ka bynta kawei ka kyrdan kaba pyndonkam ai ka surok. U la ong ba ki nongïaid kjat, ki bym kynhun ne ki bym leit ujor sha iingbishar, ki don ïa ka hok ban pyndonkam ïa ka surok.
“Mynta lada ki khih ne kim khih ruh kam leilei. Ladep ban ailad ïa ki sha ki jaka kiba biang lada ki pdiang ne kim pdiang namarba ym don mano mano ruh ba lah ban hukum ba kane ka dei ka hok jong nga namarba nalor ki nongñiah kali, nalor ki nongdie madan, ki don ruh ki nongïaid kjat ki bym don seng, ki bym leit ujor sha iingbishar, balei ngin shu pynduh noh ïa ka hok jong ki,” u la pynkut.
