Washington: Ki Nongïalam jong ka kynhun ki 7 tylli ki ri ba la tip kum ka “Group of Seven (G7)” ki la pynkhreh ïa ka kaiphod kaba pynpaw ïa ka jingsngewkhia jongki halor ka jinglehdonbor jong ka China ha kaba ïadei bad ka khaïi pateng bad ka ïoh ka kot ha ka pyrthei. Kane ka long katkum ka jingïathuh jong uwei na ki dkhot ka America uba tip bha ïa ki jingïakren jong kine ki ri.
Kata ka Kaiphod ïa kaba yn pyllait ha ka jingïalang ka ban sa long ha ka 19 haduh 21 tarik u Jymmang ha Hiroshima, Japan, la khmih lynti ba kan kdew lynti kumno kine ki 7 tylli ki ri ba lah kiew ha ka ïoh ka kot kin ïatrei lang ban ïaleh pyrshah bad khanglad ïa ka “jinglehdonbor ha ka khaïi pateng bad ka ïoh ka kot” da kano kano ka ri.
La mang ban kynthup ha kane ka Kaiphod ïa ka “bynta ba ïadei beit thik tang bad ka China” ryngkat bad ki mat jingsngewkhia ha kaba ïadei bad “ka jinglehdonbor ha ka khaïi pateng bad ka ïoh ka kot ryngkat bad kiwei kiwei ki rukom leh rukom long jong ka China”, kane ka long katkum ka jingïathuh jong uta uta u dkhot.
Kawei pat ka bynta kan kynthup ïa ka “jingkdew halor ka jingshngaiñ ha ka seispah (economic security) da kaba batai ïa ki atiar ban pyndonkam” ha kaba ïaleh pyrshah ïa ki buit sianti, kynthup ruh ïa ka jingïatreilang ki dkhot baroh. La khmih lynti ba kine ki Kaiphod kin kham pher na kiwei pat ki Kaiphod ba la pynmih da ki G7 ha ki por ba la dep.
U President jong ka US u Joe Biden u la pynlong ïa ka China kum ka phangpdeng ha ka mat treikam kaba ïadei bad ki kam bar-ri, u da phikir bha ban tehlakam ïa ka jingïakob ba kan ym kylla long ka daw jong ka jingïakyn-ad, kynthup ruh ïa ka jingïadei bad ka Taiwan ka ri synshar laitluid.
Ka kynhun G7, kaba kynthup ruh ïa ka Canada, France, Germany, Italy bad ka United Kingdom, ka don ka jingïadei bajan bha ha ka seispah bad ka China kaba dei ka nongshalan mar baheh tam ha ka pyrthei bad ka nongpynïaid ïew ïa ki kynhun khaïi jongki.
