Shillong, Risaw, 18: Ka samla Rifiness Warjri kaba la shah jied dang shen ban leit kiew ïa u lum Everest mynta ka la hap ban pynkhreh bha ïalade da kaba leit ïashim bynta ha ki jingshah hikai pyntbit ki ban sa long shen.
Kum ban shu pyntip hangne, ba ka samla Rifiness Warjri, ka samla kaba dang pule ïa ka Bachelor of Science (B.Sc) ha ka sobject Botany ha St. Anthonys’ College, Shillong bad kaba long ruh ka dkhot jong ka National Cadet Corps (NCC) dang shen ka la mihkhmat ïa ka jylla Meghalaya ban leit kiew ïa u lum Abi Gamin, u shnat lum jong u lum Himalaya uba don ha Chamoli District jong ka jylla Uttarakhand.
Ha ka jingïakren bad ki lad pathai khubor ha ka sngi Palei, ka samla Rifiness ka la ïathuh ba ka jingleit kiew ïa u lum Abi Gamin uba jrong 7,355 mitar ne 24,130 phut ka la long shisha kaba jwat. Da kane ka jingshah jied ban leit kiew ïa u lum Everest ka samla Rifiness ka la pynpaw ba ka la pynskuin haduh katta katta ïa ka mynsiem jong ka namarba ka la ïoh mynsiem na ka Kong Wansuk Myrthong bad ka Kong Dolly Kharbhih kiba la jop ïa ka jingleit kiew ha u lum Everest.
Kum ka jingai mynsiem ïa kane ka samla ba kan kynjoh sha ki kliar lum jong ka nam, ka Meghalaya State Kickboxing Association ba la lamkhmat da u Working President u Bah Lorenzo Pearson Warjri ka la pynkup burom ïa ka samla Rifiness Warjri ha ka jingïalang kaba la long ha Hotel Assembly, Shillong.
